Qyzylorda oblysynda ishimdiksiz aýyldar sany 37-ge jetti
QYZYLORDA. KAZINFORM – Qyzylorda oblysynda «Іshimdiksiz aýyl» bastamasyn qoldaǵandar qatary artyp keledi.
Oblystyq polıtsııa departamentiniń málimetinshe, ótken jyly 6 eldi meken alkogol ónimderin tutynýdan jáne satýdan tolyq bas tartsa, búginde olardyń sany 37-ge jetti.
– Bastama turǵyndardyń qaýipsizdigin qamtamasyz etýge, qoǵamdyq tártipti nyǵaıtýǵa jáne halyqtyń ál-aýqatyn arttyrýǵa oń yqpal etti. Jalaǵash aýdanynda oǵan 13 aýyl qosyldy. Tań, Eńbek, Eset batyr, T.Júrgenov, Jańatalap, Myrzabaı ahýn, Shámenov, Aqqum, Aqsý, Aqqyr, Buqarbaı batyr jáne Jańadarııa, Qaraketken eldi mekenderiniń turǵyndary alkogol ónimderinen tolyq bas tartý týraly ortaq sheshim qabyldady. Sheshim jergilikti qaýymdastyq, aqsaqaldar keńesi jáne quqyq qorǵaý organdary ókilderiniń qatysýymen ótken kezdesý barysynda qabyldandy. Aýyl kásipkerleri turǵyndardyń ortaq sheshimin qoldaý maqsatynda saýda oryndarynda alkogol ónimderin satýdy toqtatqan, - delingen polıtsııa málimetinde.
Polıtseıler ishimdiksiz aýyldarda quqyqbuzýshylyqtar men turmystyq janjaldar aıtarlyqtaı azaıǵanyn tilge tıek etip otyr.
– Búginde Jalaǵash aýdanyndaǵy birqatar aýyldyq okrýgte qylmys tirkelmegen. Bul — turǵyndardyń aýyzbirshiligi men sanaly tańdaýynyń naqty nátıjesi. Mundaı ıgi ister óńirdegi qoǵamdyq turaqtylyqty nyǵaıtyp, halyqtyń ómir súrý sapasyn arttyrýǵa negiz bolady, - delingen habarlamada.
Buǵan deıin Abaı oblysynda kezekti aýyl - Satpaev aýyldyq okrýgine qarasty Kóktúbek aýyly resmı túrde ishimdiksiz aýyl mártebesin alǵan bolatyn.
