Qyzylorda oblysynda shegirtkeler jyldaǵydan eki apta erte oıandy
QYZYLORDA. KAZINFORM — Búgin Qyzylorda oblysynda shegirtkemen kúres jumysy bastaldy.
AShM Agroónerkásiptik keshendegi memlekettik ınspektsııa komıteti Qyzylorda oblystyq aýmaqtyq ınspektsııasynyń málimetinshe, bıyl 60 myń gektardan astam jerdi hımııalyq jolmen óńdeý josparlanyp otyr. Zııankestiń, ásirese, ıtalııalyq prýs, azııalyq, saıaq sııaqty túrleri qaptaýy múmkin ekeni eskerilip, fıtosanıtarııalyq is-sharalar kúsheıtildi. Oǵan 4 arnaıy jer agregaty, 2 jeńil ushaq, 1 ushaq jáne 3 drondy qatystyrý kózdelgen.
— Ótken jylǵa qaraǵanda bıyl Qyzylorda oblysynda shegirtkeler 12-13 kúnge erte oıandy. Italııalyq prýs dernásilderiniń 98%-y Aral aýdanynyń aýmaǵynda. Arǵy jaǵyndaǵy Ulytaý, Aqtóbe oblystarynan ushyp kelgen sııaqty. Zııankes jumyrtqa salǵan aýmaq zertteldi. Qazir jer betine dernásilderi shyǵyp jatyr, — dedi ınspektsııa basshysy Muhtar Orazbaev.
Zııankestiń taralý aýmaǵy Aral aýdany boıynsha 21 720 gektar, Qazalyda 1482 gektar, Qarmaqshy aýdanynda 100 gektar, Jalaǵash aýdanynda 1300 gektar aýmaqty qamtyp otyr. Inspektsııa basshysy atap ótkendeı, Qyzylorda qalasy men Shıeli, Jańaqorǵan aýdandarynda ıtalııalyq prýstyń dernásilderi joq.
— Esesine azııalyq shegirtke dernásilderi basym. Mysaly, eń úlken bóligi Shıeli aýdanynda — 8332 gektar. Odan bólek, Jańaqorǵanda 5 myń, Qarmaqshyda 6 myń, Qazalyda 5490, Aralda 4 myń gektar jerge azııalyq shegirtke dernásilderi shyǵyp jatqany anyqtaldy, — dedi Muhtar Orazbaev.
Sınoptıkter boljamynsha aldaǵy ýaqytta óńirde aýa temperatýrasy 44ºS-ge deıin kóteriledi. Shegirtkeniń kóbeıýine qolaıly ýaqyt — osy kezeń. Al jerdi ýlaý jumysy týraly bal aralaryna zııany tıip ketpes úshin omartashylarǵa aldyn ala habarlanady.
Buǵan deıin biz Qyzylorda oblysynda karantındik zııankesterge qarsy hımııalyq óńdeý jumysy mamyr aıynyń sońyna qaraı bastalatynyn jazǵanbyz.