Qyzylorda oblysynda shegirtke shabýyly týraly jalǵan aqparat taratqandar qatań jazalanady

ASTANA. KAZINFORM –  Qazir elimizde shegirtke shabýylymen kúres sharalary qarqyndy júrip jatyr. Tolyǵyraq Premer-mınıstrdiń orynbasary – Ulttyq ekonomıka mınıstri Serik Jumanǵarın aıtyp berdi.

– Qazir shegirtkeler shabýylynyń sońǵy kezeńi ótip jatyr. Kelesi jyly, árıne, mundaı kólemdegi shabýyl bolmaıdy. Tańerteń shegirtkege qatysty respýblıkalyq jedel shtab otyrysyn ótkizdim. Birinshiden, Qyzylorda oblysynda jalǵan aqparat taratqandarǵa qarsy qatań sharalar qoldanamyz. Óıtkeni halyq arasynda dúrbeleń týǵyzady. Bul óńirde shegirtkemen kúres jumysy aıaqtalýǵa jaqyn. Egistikke eshqandaı zııan kelmedi. Túrkistan jáne Jambyl oblysynda da osy jaǵdaı, - dedi Serik Jumanǵarın Májiliste ótken Úkimet saǵatynan keıin.

Onyń aıtýynsha, shegirtkeniń kóbeıýi 12 jyl saıyn qaıtalanady. Sondaı-aq vıtse-premer qazir qaýipti aımaqtar retinde Aqtóbe men Qostanaı oblysy jáne Reseımen shekarany aıtyp otyr. Sebebi shegirtke Aqmola oblysyna ótip ketýi múmkin.

– Aýyl sharýashylyǵy mınıstri Aqtóbe oblysyna ushyp ketti, keıin Qostanaı oblysyna barady. Biz aýqymdy jumysqa kirisip jatyrmyz. Eshqandaı keri áser bolmaıtynyna 100% senimdimin. Óıtkeni ótken jylǵy tájirıbe bar. Drondar satyp aldyq, 3445 adamdy dalany zertteý júrgizýge shyǵardyq, resýrs jetkilikti, - dep tolyqtyrdy Úkimet basshysynyń orynbasary.

Aıta ketsek, áleýmettik jelide Qyzylorda oblysy Aral aýdanynyń eldi mekenderinde shegirtke qaptap ketkeni týraly vıdeo taraǵan edi. Keıin Aýyl sharýashylyǵy mınıstrligi túsinik berdi. 

Eske salsaq, bıyl Qyzylorda oblysynda shegirtkeler jyldaǵydan eki apta erte oıandy.