Qyzylorda oblysynda «saqaldy» qurylys bar ma

QYZYLORDA. KAZINFORM — Bıyl 10 aıda Qyzylorda oblysyndaǵy qurylys jumysyna bólingen qarjy kólemi 235 mlrd teńgege jetti. Bul ótken jyldyń osy kezeńimen salystyrǵanda 117,6%-ǵa artyq. 

Oblystyq qurylys, sáýlet jáne qala qurylysy basqarmasynyń málimetine súıensek, osy kezge deıin josparlanǵan qarjynyń 80,9 mlrd teńgesi nemese 98,7%-y dittegen maqsatqa jumsaldy.

— Oblys kóleminde 96 jobanyń qurylysyn júrgizý jáne 2980 páter satyp alý josparlanǵan. Onyń ishinde bilim berý salasynda 11 (5-i — «Keleshek mektebi»), densaýlyq saqtaý salasynda 9, mádenıet salasynda 6, sport salasynda 8 nysan jáne taǵy kóptegen joba bar. «Keleshek mektebi» ulttyq jobasy aıasynda barlyǵy 6900 oryndyq 10 mektep salyndy. Qyzylorda oblysy respýblıkada Prezıdent tapsyrmasyn alǵashqylardyń biri bolyp aıaqtady. Aral aýdanynyń Jalańash aýylyndaǵy 150 oryndyq mekteptiń qurylysy jyl sońyna deıin aıaqtalady, — dedi basqarma basshysy Erlan Tórálıev.

Qazirgi kúni oblys ortalyǵynda, ıaǵnı Syrdarııa ózeniniń sol jaǵalaýynda 35,5 mlrd teńgege kópbeıindi aýrýhana salynyp jatyr. Aýrýhanada sondaı-aq bir aýysymda 100 kelýshini qabyldaıtyn emhanasy bar 300 tósektik onkologııalyq bólimshe qamtylǵan. Qurylysshylar Aral jáne Qazaly aýdandaryndaǵy ortalyq aýrýhanalardy kóp uzamaı rekonstrýktsııalap, Qamqorlyq ortalyǵyna beıimdemek.

Basqarma basshysy Kazinform tilshisiniń «Qyzylorda oblysynda qurylysy uzaqqa sozylǵan nysandar bar ma?» degen suraǵyna jaýap berdi.

— Men 2022 jyly qyzmetke kelgen kezde «saqaldy» qurylystar máselesi boıynsha osy jylǵa deıin qurylysy uzaqqa sozylǵan áleýmettik mańyzdy 5 nysan bar bolatyn. Oblys ákiminiń tapsyrmasymen basqarmanyń tikeleı tapsyrysyndaǵy mundaı nysandar máselesi sheshimin taýyp, paıdalanýǵa qabyldandy. Búgingi kúni basqarmanyń tikeleı tapsyrysynda qurylysy uzaqqa sozylǵan nysandar joq, — dedi ol.

Buǵan deıin biz Qyzylorda oblysynda apatty jaǵdaıdaǵy jáne tozyǵy jetken ǵımarattardy jańartý jumysy qarqyndy túrde júrgizilip jatqanyn jazǵan edik.