Qyzylorda oblysynda irgeles eldimekenderge ortaq qoqys polıgony salyna bastady
QYZYLORDA. KAZINFORM — Bıyl 6 aıda Qyzylorda oblysynda 152 340 tonna qatty turmystyq qaldyq jınalsa, sonyń 52 935 tonnasy nemese tek 35%-y óńdeldi.
Oblystyq tabıǵı resýrstar jáne tabıǵat paıdalanýdy retteý basqarmasynyń málimetinshe, 17 kásipkerlik sýbektisi qaldyqty jınaý, tasymaldaý, suryptap, óńdeýmen aınalysady.
— 140 eldimekende polıgon qyzmeti úshin 402 gektar jer ýchaskeleri belgilengen. Onyń 7-ine ekologııalyq, sanıtarlyq ruqsat qujaty alynǵan. Bul — polıgondardyń nebári 5%-y. Qoqysty basqarý máselesin tıimdi sheshý joly retinde biz bir-birine jaqyn ornalasqan aýyldyq eldimekender úshin ortaq bir polıgonnan salýdy bastadyq. Osy rette Syrdarııa aýdanynyń ortalyǵynda jańadan nysan salyndy. Ol jalǵyz Tereńózek kentine emes, Toqmaǵambetov, Qaljan ahýn, Seıfýllın sııaqty irgeles aýyldarǵa da arnalǵan, — dedi basqarma basshysynyń mindetin atqarýshy Qaırat Jansultanuly.
Ekonomıkalyq jaǵynan tıimdi ádis aldaǵy ýaqytta oblystyń barlyq aýdanyna qoldanylmaq.
Búginde oblysta turmystyq qatty qaldyqty suryptaý, óńdeý baǵytynda 99 mlrd 259 mln teńgege 10 joba júzege asyrylyp jatyr.
— Naýryz aıynda Jańaqorǵan aýdanynda suryptaý kesheni iske qosyldy. Aral, Qazaly jáne Jalaǵash aýdandarynda osyndaı jobanyń ekinshi kezeńi maquldandy. Olar da qarjylandyrylady. Qyzylorda qalasyndaǵy Ońtústik Koreıa tehnologııasy boıynsha qatty turmystyq qaldyqty suryptaý, óńdeý jáne kádege jaratý, plastık qaldyqty óńdeý jobalaryn ınvestorlar júzege asyrmaq. Makýlatýra men karton qaldyǵyn qaıta óńdep, dárethana qaǵazyn shyǵaratyn zaýyt jyl aıaǵyna deıin iske qosylady, — dedi basqarma ókili.
Buǵan deıin biz Shyǵys Qazaqstan oblysynda týrıster jıi baratyn tórt aýdanda qatty turmystyq qaldyqtarǵa arnalǵan polıgon áli kúnge deıin salynbaǵanyn jazdyq.
