Qyzylorda oblysynda reıd kezinde 362 quqyq buzý deregi tirkeldi

QYZYLORDA. KAZINFORM – Qyzylorda oblysynda quqyqbuzýshylyqtyń aldyn alý, jol qozǵalysy qaýipsizdigin qamtamasyz etý jáne qoǵamdyq tártipti saqtaý maqsatynda reıdtik-profılaktıkalyq is-shara ótti. 

Oblystyq polıtsııa departamentiniń baspasóz qyzmeti habarlaǵandaı, reıd barysynda 362 ákimshilik quqyq buzý deregi anyqtaldy.

– Tıisti qujatsyz kólik basqarýdyń 31, qaýipsizdik beldigin taqpaýdyń 101, qaýipsizdik beldigin qaıtalap taqpaýdyń 44 deregi tirkeldi. Sonymen qatar kólik terezelerin zańsyz qarańǵylaý jáne LED jaryq shamyn ornatýdyń 36, kúndizgi jaryq shamyn jaqpaýdyń 10, kólik basqarý kezinde uıaly telefon paıdalanýdyń 13 deregi anyqtaldy. 1 júrgizýshi mas kúıinde kólik tizgindese, 8 adam avtokólik qujattaryn ózimen birge alyp júrmegen, - delingen habarlamada. 

Barlyq quqyqbuzýshylyq boıynsha ákimshilik hattama toltyrylyp, 55 kólik aıyppul turaǵyna qoıyldy. Osy oraıda tártip saqshylary júrgizýshilerdi jol qozǵalysy erejelerin qatań saqtaýǵa jáne zań talaptaryn oryndaýǵa shaqyrady. 

Jýyrda Senat depýtaty Marat Qojaev jol erejesin jıi buzatyndar aıyppuldy joǵary somada tóleýi kerek ekenin aıtty.