Qyzylorda prokýrorlary kásipkerlerdi zańsyz tekserýdiń 590-nan astam áreketiniń aldyn alǵan

QYZYLORDA. KAZINFORM – Bul týraly oblystyq prokýratýranyń baspasóz qyzmetinen málim boldy.

Baspasóz qyzmetiniń málimetterine «Zań jáne tártip» ıdeologııasy aıasynda Qyzylorda oblysynyń prokýrory Rızabek Ojarov kásipkerlermen kezekti kezdesý ótkizip, oǵan oblys ákimi, quqyq qorǵaý, memlekettik organdar basshylary men bıznes-qaýymdastyq qatysqan.

Іs-sharada prokýratýranyń bıznesti qorǵaý boıynsha jumysy baıandalyp, kásipkerlerdiń máseleleri talqylanǵan.

Bıyl qabyldanǵan sharalar nátıjesinde 1400-den astam kásipkerdiń quqyǵy qorǵalyp, 24 laýazymdy tulǵa túrli jaýapqa tartyldy.

Kásipkerge tıesili 100 mln teńgeden astam qarjy qaıtaryldy.

Jalpy el ekonomıkasyna úlesi 568 mlrd teńgeni quraıtyn 12 ınvestordyń problemalyq máseleler sheshildi.

590-nan astam kásipkerlik sýbektileriniń qyzmetine zańsyz tekserýlerdiń aldyn aldy.

Mysaly, «Prokýrorlyq súzgi» jobasy aıasynda ýákiletti organnyń «Maral-Nur» JShS-ne qatysty jer ýchaskeleriniń májbúrlep alyp qoıý týraly talap qoıý aryzy kelisýden bas tartyldy.

Sonymen qatar, qabyldanǵan sharalardyń nátıjesinde ınvestordyń jer ýchaskesine qoıylǵan shekteýler alynyp tastaldy.

Bıylǵy 3 aıda prokýratýranyń mobıldi tobyna 20-ǵa jýyq «sıgnal» kelip tústi, onyń 5-i rastaldy.

Olar boıynsha prokýrorlyq den qoıý sharalary qabyldandy.

- Kásipkerler men ınvestorlardyń quqyqtaryn qorǵaý jumystary erekshe baqylaýda. Kásipkerler men ınvestorlardyń sıgnaldaryn dereý qaraý maqsatynda oblys prokýratýrasynyń alanyńda Front-ofıs qurylǵanyn jáne táýlik boıy mobıldik top jumys jasaıtyndyǵyn habarlaımyz (baılanys telefony 8700-156-11-66), - delingen habarlamada.

Osyǵan deıin Bas prokýratýranyń Almaty oblysynda kásipkerlikke kedergi jasaý áreketi boıynsha tekserý júrgizip jatqanyn habarladyq.