Qyzylorda oblysynda prokýratýra ınvestordy negizsiz salynǵan aıyppul tóleýden bosatty

QYZYLORDA. KAZINFORM - Qyzylorda oblysynda prokýratýra ınvestordy negizsiz salynǵan 112 mln teńge aıyppul tóleýden bosatty.

Oblystyq prokýratýra bastamasymen ınvestorlardy qoldaýǵa nazar aýdarylyp otyr. Sol arqyly aımaqta polımetall kenin ónerkásiptik ıgerý jobasyn júzege asyryp jatqan «ShalqııaTsınk LTD» AQ-na jeke sot oryndaýshylar tarapynan negizsiz qozǵalǵan atqarýshylyq is toqtatylǵan.

- Atalǵan ınvestorǵa «Prokýrorlyq súzgi» jobasy aıasynda Tabıǵı monopolııalardy retteý departamenti 19 ákimshilik is negizsiz qozǵaǵany anyqtaldy. Іs júrgizýdi toqtatý nátıjesinde ınvestor 112 mln teńge aıyppul tóleýden bosatyldy. Investorlardyń quqyǵyn buzǵany úshin ártúrli deńgeıdegi 9 laýazymdy adam tártiptik jaýaptylyqqa tartyldy, - dep málim etti oblystyq prokýratýradan.

Byltyr prokýratýra tarapynan mańyzdy ınvestıtsııalyq jobalardy qoldaýǵa nazar aýdaryldy. Sol arqyly 24 ınvestorǵa aýqymdy kómek kórsetildi. Onyń ishinde Túrkııa jáne Qytaı elderiniń ınvestorlary bar. 

- Atap aıtqanda, qytaılyq ınvestor «Gejýba Shıeli Tsement kompanııasy» bir jyldan asa ýaqyt boıy tsement zaýytynyń sanıtarııalyq-qorǵanysh aımaǵyn belgileı almaǵan. Investor tarapynan aıtylǵan ýájderi ýákiletti organdarmen qoldaý taýyp, sanıtarııalyq qaǵıdaǵa tıisti ózgerister engizildi. Nátıjesinde atalǵan kompanııanyń sanıtarııalyq-qorǵanysh aımaǵy qysqartylyp, jobaǵa sanıtarııalyq-epıdemıologııalyq oń qorytyndysy alyndy. Qazir zaýytta 400-den astam adamdy turaqty jumys ornymen qamtylǵan. Óz ónimderin shyǵaryp, elimizdiń kóptegen óńirine jiberedi, - dep tolyqtyrdy oblystyq prokýratýradan. 

Vedomstvo málimetinshe, polımetall kenderin ónerkásiptik ıgerý baǵyttalǵan bý-gaz qurylǵysynyń qurylysy boıynsha jobany keńeıtý úshin «Aksa Enerdjı» túrik ınvestoryna qosymsha jer berilgen.

Eske salsaq, budan buryn Qyzylorda qalasynyń prokýratýrasy alıment boıynsha bereshek keıbir boryshkerdiń býkmekerlik keńselerde aqshaǵa bás tigip júrgenin anyqtady.