Qyzylorda oblysynda polıtseıler jolda qalyp qoıǵan 1800-ge tarta adamǵa kómek kórsetti
QYZYLORDA. KAZINFORM - Qyzylorda oblysynda polıtseıler kúnniń sýyǵynda jolda qalyp qoıǵan 1800-ge tarta adamǵa kómek kórsetti. Olar Aqtóbe oblysyndaǵy aýa raıy qolaısyzdyǵy saldarynan Aral jáne Qazaly aýdandarynda aıaldaýǵa májbúr bolǵan.
Qyzylorda oblysy ákimdigi baspasóz qyzmetiniń málimetine súıensek, 7 aqpannan bastap, Qazaly aýdanynyń Oıyndy eldi mekeni tusyndaǵy «Mıras» keshenine 135 júk kóligi (fýra) men 35 jeńil avtokólik toqtatyldy.
«Aýdan ákimdigi keshen basshylyǵymen kelissóz júrgizip, jolaýshylarǵa arzan baǵamen tamaq berilýde. Dári-dármek, aýyzsý tegin úlestirildi. Azyq-túlik qory jetkilikti. Balaly jolaýshylarǵa keshenniń qonaq úıinen tegin jatyn oryndar daıyndaldy, kezekshilik qoıylǵan. Tek Aral, Qazaly ǵana emes, barlyq aýdanda jolaýshylarǵa aýdan ákimdikteri tarapynan tıisti kómek kórsetilip jatyr. Jaǵdaı oblys ákimi Nurlybek Nálibaevtyń tikeleı baqylaýynda», - dep málim etti baspasóz qyzmetinen.
Al oblystyq polıtsııa departamentiniń habarlaýynsha, Qazaly aýdanynda 230-ǵa jýyq júk jáne jeńil kólik toqtatylǵan. Onda barlyǵy 600-ge jýyq adam bolǵan.
Sondaı-aq, Aral aýdanynan 20 shaqyrym qashyqtyqtan Aqtóbe baǵytyna qaraı respýblıkalyq mańyzy bar avtojoldar jabyq. Bul aýmaqta barlyǵy 807 avtokólik (584 júk kóligi, 17 jolaýshylar kóligi, 210 jeńil kólik) jáne 1200-ge jýyq jolaýshy jaqyn mańdaǵy jylytý pýnktterine jetkizildi.
«Qazirgi tańda joldyń jabyq bolýyna baılanysty arnaıy shtab qurylǵan. Polıtsııa qyzmetkerleri avtojoldarda táýlik boıy kúsheıtilgen rejımde qyzmet atqarýda. Polıtsııa qutqarýshylarmen jáne jergilikti atqarýshy organdarmen birlesip, kómek berý jumystaryn úzdiksiz júrgizýde. Qyzylorda oblysynyń Polıtsııa departamenti turǵyndardy qolaısyz aýa - raıy jaǵdaıyn eskerip, alys jolǵa shyqpaýlaryn suraıdy», - dep tolyqtyrdy departamentten.
