Qyzylorda oblysynda negizgi kapıtalǵa tartylǵan ınvestıtsııa 41,4 paıyzǵa artty
QYZYLORDA. KAZINFORM — Qyzylorda oblysynda alǵashqy jartjyldyqta negizgi kapıtalǵa tartylǵan ınvestıtsııa kólemi ótken jyldyń esepti kezeńimen salystyrǵanda 41,4 paıyz artty.
Bul jóninde oblys ákimi Nurlybek Nálibaev oblystyq máslıhattyń kezekten tys XVI sessııasy málim etti.
Sessııada bıylǵy 6 aıdyń qorytyndysy boıynsha negizgi makroekonomıkalyq kórsetkishterdiń ósimi qamtamasyz etilgeni aıtyldy.
Máselen, ónerkásip óndirisi 5, óńdeý ónerkásibi 37,5, aýyl sharýashylyǵy 4, qurylys jumystarynyń kólemi 35,6, turǵyn úı 3,7, kólik 3,4, saýda 3,6 paıyzǵa artty.
Óńirdegi munaı qorynyń sarqylýy saldarynan keıingi 10 jyl boıy tómendeý tendentsııasy baıqalyp otyr. Soǵan qaramastan ónerkásip óndirisi ótken jyldyń qyrkúıek aıynan beri oń dınamıkaǵa shyqty.
Ósim óńdeý ónerkásibi esebinen qalyptasty. Saladaǵy ósý qarqyny boıynsha 2022 jyly Qyzylorda oblysy respýblıkada 11-orynda bolǵan edi.
Ótken jyldan beri alǵashqy úshtikke endi.
«Sheteldik ınvestorlardyń óńirde jumys isteýine qolaıly klımat qalyptasqan. Sol sebepti aýqymdy ınvestıtsııalyq jobalar júzege asyrylýda. Bıylǵy jyldyń 6 aıynda negizgi kapıtalǵa tartylǵan ınvestıtsııa kólemi ótken jyldyń esepti kezeńimen salystyrǵanda 41,4 paıyz artty. Kásipkerlikti qoldaýǵa sońǵy 2 jylda (2022-2023 jyldary) 127 mlrd 500 mln teńge tartylyp, 12 myńnan astam jobaǵa qarjy tartyldy. Onyń 25 mlrd 100 mln teńgesi memlekettik baǵdarlama aıasynda qoldaý tapty. Bıyl ekinshi deńgeıli bankter men qarjy uıymdary arqyly 3 myńǵa jýyq joba qarjylandyryldy. Aýyl sharýashylyǵy salasyna keıingi 2 jylda 20 mlrd 300 mln teńgeden astam ınvestıtsııa tartyldy. Jyl basynan beri 6 aıda saladaǵy negizgi kapıtalǵa 3 mlrd 300 mln teńge ınvestıtsııa salyndy. Bıyl bıýdjetten turǵyn úı qurylysyna jáne jeke salýshylardan daıyn páterler satyp alýǵa 34 mlrd 100 mln teńge qaraldy. Jyl qorytyndysymen 2,5 myńnan astam páter paıdalanýǵa beriledi. Aımaqta 43 mlrd teńgege 300 shaqyrymnan astam jol jóndeledi. Jyl aıaǵyna deıin jaqsy jaǵdaıdaǵy joldar úlesi 92 paıyzdan asady. Elektr energııasymen qamtý baǵytynda 11 mlrd teńgege 38 joba júzege asyp jatyr. Nátıjesinde jelilerdiń tozý deńgeıi 6 paıyzdan 62 paıyzǵa tómendeıdi. Turǵyndardy gazben qamtý kórsetkishi 78 paıyzǵa jetkiziledi. Oblys halqynyń 98,4 paıyzy ortalyqtandyrylǵan aýyz sýmen qamtylǵan», — dedi N.Nálibaev.
Bıyl «Jaıly mektep» ulttyq jobasy aıasynda 10 mekteptiń, «Bilimdi qoldaý qory» esebinen daryndy balalarǵa arnalǵan fızıka-matematıka baǵytyndaǵy 300 oryndyq jataqhanasy bar 400 oryndyq mektep-ınternattyń qurylysy júrip jatyr.
Jergilikti bıýdjet esebinen 8 mektep ǵımaraty kúrdeli jóndeýden ótýde.
«QazGerMunaı» kompanııasynyń demeýshiligimen boı kótergen 350 oryndyq Oqýshylar saraıy paıdalanýǵa beriledi.
«Saýts Oıl» kompanııasynyń demeýshiligimen Syrdarııa ózeniniń sol jaǵalaýynan mýzykalyq kolledjdiń jańa ǵımaraty salynýda.
Nysan 2025 jyly iske qosylady. Oblystyq tarıhı-ólketaný mýzeıiniń qurylysy bastalyp, Shyǵarmashylyq akademııasy boı kótere bastady.
