Qyzylorda oblysynda Naýryz meıramy aıasynda 700-ge jýyq is-shara uıymdastyrylady
QYZYLORDA. KAZINFORM – Qyzylorda oblysynda 14-23 naýryz aralyǵynda Naýryz meıramyn keń kólemde nasıhattaýǵa arnalǵan 700-ge jýyq mádenı-kópshilik is-shara uıymdastyrylady. Merekelik sharalar búgin, 14 naýryzda Amal kúni kúni márekesimen bastaldy.
«Amal merekesine oraı «Amal keldi, Jyl keldi» atty mádenı-kópshilik shara uıymdastyrylady. Sondaı-aq erikti jastar qarttar úıinde ardagerlerdi quttyqtap, qurmet kórsetedi. Odan keıin «Naýryz-Dýman» taqyrybynda etno-mádenı birlestikter ókilderiniń qatysýymen perfomans ótkiziledi. Naýryz meıramyn atap ótýdiń jańa tujyrymdamasyna sáıkes, 73 tarmaqtan turatyn oblystyq is-sharalar jospary bekitildi. Merekeni joǵary deńgeıde atap ótý maqsatynda uıymdastyrý-daıyndyq sharalary qarqyndy júrýde. Merekelik sharalar asyndaǵy ár kúnniń óz ataýy bar. Búgin Amal kúni bolsa, 15-i «Qaıyrymdylyq kúni» dep bilgelingen. Bul kúni kóp balaly otbasy, eńbek adamdary, qoǵam belsendileri, ardagerler jáne taǵy basqa azamattarǵa arnap aýyzashar beriledi. Buǵan qosa, «Sharapatty Ramazan» atty aýyzashar qorjynyn taratý sharasy da uıymdastyrylmaq», - dedi oblystyq qoǵamdyq damý basqarmasynyń basshysy Almasbek Esmahanov.
Sondaı-aq, aımaqtaǵy áleýmettik az qamtylǵan 2 300 otbasyǵa qaıyrymdylyq kómek beriledi. Al 16 naýryz «Mádenıet jáne ulttyq salt-dástúr» 17-i «Shańyraq», 18-i «Ulttyq kıim», 19-y «Jańarý», 20-y naýryz «Ulttyq sport», 21-i «Yntymaq» kúni dep belgilengen. Al 22 naýryz «Jyl basy» bolyp bekitilip, oblystyń barlyq aýmaǵynda buqaralyq is-sharalar, merekelik teatrlandyrylǵan qoıylymdar, kontserttik baǵdarlama, ulttyq sport saıystary ótedi dep josparlanǵan.
Aıta keterligi, 14-23 naýryz aralyǵynda oblystyń mádenıet uıymdarynda Naýryz meıramyn keń kólemde nasıhattaýǵa arnalǵan 700-ge jýyq mádenı-kópshilik is-shara uıymdastyrylmaq.
«Naýryz meıramyn keń kólemde atap ótý úshin oblys kóleminde túrli is-sharalar uıymdastyrylýda. Máselen, oblys kitaphanalary men mýzeılerinde ashyq esik kúnderi, taqyryptyq kórmeler ótedi. Sondaı-aq, mýzeıge kelýshiler etnografııalyq zaldarda salt-dástúrmen jaqyn tanysýǵa múmkindik alady. Al, 16 naýryzda S.Aıtbaev atyndaǵy kórkemsýret galereıasynda Qazaqstan Sýretshiler odaǵynyń múshesi, kreatıv sýretshi Dáýlet Toıshybaevtyń «Kilem art» atty zamanaýı kilem betine sýret salý óner kórmesi men «Anaǵa taǵzym» ortalyǵynda qazaqtyń salt-dástúrinen arnaıy rásimder ótedi. Sondaı-aq, «Aqmeshit» mýzeıi fılıalynda «Uly dalanyń ulyq merekesi» atty merekelik shara, N.Bekejanov atyndaǵy Qyzylorda oblystyq qazaq akademııalyq mýzykalyq drama teatrynda balalar qoıylymy jáne barlyq mádenıet uıymdarynda ulttyq salt-dástúrdi nasıhattaýǵa baǵyttalǵan is-sharalar, mádenıet úıleri men klýbtarda ulttyq fılmderdiń kórsetilimderi ótkiziledi. 18 naýryz – Ulttyq kıim kúninde «Anaǵa taǵzym» ortalyǵynda «Etno Fashion» ulttyq kıimderden sán úlgisi festıvali uıymdastyrylsa, «Otbasy ortalyǵynda» ulttyq kıimder defılesi ótedi. Aıta keteıik, áleýmettik jelilerde ulttyq kıimderdi dáripteý úshin arnaıy chellendj uıymdastyrylady. Al 22 naýryzda Óner ortalyǵynyń aldynda «Rýhanııat aýyly» uıymdastyrylyp, onda kıiz úıler tigilip, kreatıvti qolóner sheberleriniń saýda kórmeleri, mýzeı, kitaphana, arhıv salalary boıynsha taqyryptyq kórmeler, ulttyq kıimderden defıle, salt-dástúrlerden kórinister, jyrshy-jyraýlardyń, dástúrli oryndaýshylardyń kontserti ótedi, - dedi.
Aıta keteıik, bıyl Baıqońyr qalasynda memlekettik jáne ulttyq merekelerdi ótkizý boıynsha negizgi is-sharalar jospary ázirlengen bolatyn. Osyǵan sáıkes, 23 naýryz kúni Baıqońyr qalasynda ótetin Naýryz merekesinde oblystyq fılarmonııanyń kontserti uıymdastyrylady. Qyzylorda qalasy ákimdigi tarapynan 150-ge jýyq merekelik, sporttyq jáne mádenı is-sharalar ótkiziledi.
