Qyzylorda oblysynda naýryz aıynda 331 adam qyzylsha juqtyrdy

QYZYLORDA. KAZINFORM - Qyzylorda oblysynda naýryz aıynda 331 adam qyzylsha juqtyrdy. Bul aýrý boıynsha tómendeý tendentsııasy baıqalyp otyr.

Qyzylorda oblysynda qyzylsha aýrýynyń epıdemıologııalyq ahýaly turaqtanyp keledi. Bıyl qańtar aıynda ol 366 adamnan aýrý anyqtalsa, aqpanda ol 347 derekti qurady. Al naýryzda atalǵan kórsetkish 331 adamǵa tústi.

«Bul jóninen tómendeý tendentsııasy baıqalyp otyr. Ony qyzylshaǵa qarsy qosymsha jappaı ımmýndaý naýqanynyń tıimdiliginen ańǵarý qıyn emes. Ótken jyldyń 6 qarashasynan oblysta jappaı ımmýndaý naýqany júrgizildi. Qazirge deıin 71233 adam aýrýǵa qarsy ekpe alyp, ujymdyq ımmýnıtet qalyptasty. Epıdemıologııalyq ahýaldy turaqtandyryp, vırýs aınalymyn álsiretý úshin áli de tıisti kontıngent ekpemen qamtylýy tıis. Qazir oblystaǵy barlyq emhanada qyzylshaǵa qarsy qosymsha ımmýndaý jalǵasyp jatyr. Ekpe qory jetkilikti, vaktsınadan keıingi asqyný jaǵdaılary bolǵan joq», - dedi Qyzylorda oblysynyń sanıtarııalyq-epıdemıologııalyq baqylaý departamenti basshysy Dınara Jańabergenova.

Departament mamandary ata-analardy 6-11 aılyq sábıin, 2-5 jas aralyǵyndaǵy balalaryn aýrýǵa qarsy egýge shaqyrady. Budan bólek, Ulttyq egý kúntizbesine sáıkes árbir bala 12-15 aılyǵynda jáne 6 jasynda qyzylsha, qyzamyq pen parotıtke qarsy vaktsına alýy qajet ekenin aıtady.

Eske salsaq, budan buryn Qyzylorda oblysynda Kongo-qyrym qandy bezgegine qaýipti 115 eldi meken anyqtaldy.