Qyzylorda oblysynda medıtsınalyq qyzmet sapasy boıynsha shaǵym kóbeıgen
QYZYLORDA. KAZINFORM — Ótken jyly Áleýmettik medıtsınalyq saqtandyrý qoryna keri baılanys arnalary arqyly Qyzylorda oblysynyń turǵyndarynan medıtsınalyq qyzmet alý jóninde 2 669 ótinish tústi. Bul týraly qor fılıalynyń dırektory Jaqsylyq Abdýsametov málimdedi.
Ótinishtiń basym bóligi keńes berý sıpatynda boldy. Azamattardy MÁMS jarnasyn tóleý tártibi, medıtsınalyq qyzmetpen, dári-dármekpen qamtamasyz etý, joldama jáne eńbekke ýaqytsha jaramsyzdyq paraǵyn rásimdeý, medıtsınalyq kómek kórsetý sharttary, jeńildik sanaty men tizimindegi ózgerister qyzyqtyrǵan.
— Qor júıesine barlyǵy 736 shaǵym túsken. Bul 2024 jylǵyǵa qaraǵanda 111 shaǵymǵa nemese 11,9%-ǵa az. Qaıtaryp alynǵan shaǵymdardyń úlesi 51,1%-dan 56,3%-ǵa deıin ósti. 736 shaǵymnyń 415-i (56,3%) patsıentterdi qoldaý qyzmeti men medıtsınalyq uıymdardyń ishki saraptama bólimderi arqyly «osy jerde jáne dál qazir» qaǵıdaty boıynsha qaıtaryp alynǵan nemese sheshimin tapqan. «Qyzylordalyqtar negizinen ne nársege shaǵymdandy?» degenge keleıik. Medıtsınalyq kómektiń sapasyzdyǵy boıynsha 294 (39,9%), medıtsınalyq kómek kórsetýden bas tartý boıynsha 238 (32,3%), TMKKK jáne MÁMS sheńberinde dárilik zattardy berýden bas tartý boıynsha 94 (12,8%) shaǵym túsken, — dedi Jaqsylyq Abdýsametov.
MÁMS júıesi iske qosylǵaly keri baılanystyń birneshe arnasy paıda boldy. Olar — msqory.kz resmı saıty, Qoldau 24/7 mobıldi qosymshasy jáne 1414 baılanys ortalyǵy.
— Ótinishter mindetti túrde qaralady jáne tolyq sheshilgenge deıin baqylaýda bolady. Fılıalda biz ótinishterdi taldaımyz. Bul densaýlyq saqtaý salasyndaǵy júıeli máselelerdi anyqtaýǵa, sondaı-aq MÁMS pen TMKKK aıasynda medıtsınalyq kómektiń ashyqtyǵyn, qoljetimdiligi men sapasyn arttyrý úshin halyqpen keri baılanysty tıimdi paıdalanýǵa múmkindik beredi, — dedi fılıal basshysy.
Búginde Qyzylorda oblysynda mindetti áleýmettik saqtandyrý júıesi aıasynda 684 myńnan astam adam, ıaǵnı aımaq halqynyń 83,6%-y saqtandyrylǵany belgili.