Qyzylorda oblysynda MÁMS qorynan zańsyz tólengen 73 mln teńge memleketke qaıtaryldy
QYZYLORDA. KAZINFORM – Qyzylorda oblysynyń prokýratýrasy «Áleýmettik medıtsınalyq saqtandyrý qory» KEAQ oblystyq fılıalynda qor qarajatynyń ıgerilý zańdylyǵyna taldaý júrgizdi.
Taldaý barysynda memlekettik medıtsınalyq uıymdardyń jeke medıtsınalyq uıymdarǵa, ıaǵnı birlesip oryndaýshylarǵa shartta belgilengen somadan artyq tólem jasaǵany anyqtaldy.
- «Jańaqorǵan ortalyq aýdandyq aýrýhanasy» ShJQ KMK JShS-ke 2023 jyly 33,1 mln teńge, 2024 jyly 6,6 mln teńge, al «Aral ortalyq aýdandyq aýrýhanasy» ShJQ KMK 2023 jyly 13,8 mln teńge, 2024 jyly 18,6 mln teńge artyq qarajat aýdarǵan. Osylaısha birlesip oryndaýshyǵa jalpy 73 mln teńge negizsiz tólem jasalǵan, - delingen habarlamada.
Prokýratýranyń usynysy negizinde zańbuzýshylyqtar joıylyp, jaýapty laýazymdy tulǵalar tártiptik jaýapkershilikke tartyldy. Sot sheshimderimen 73 mln teńge tolyq kólemde óndirildi.
Eske salaıyq, jýyrda Aqmola oblysynda «Avıtsenna-Býrabaı» JShS-niń medıtsına qyzmetkerleri jalaqynyń keshiktirilýine, eńbek demalysy jáne saýyqtyrý tólemderiniń berilmeýine, sondaı-aq zeınetaqy men medıtsınalyq saqtandyrý jarnalaryna qatysty máselelerge shaǵymdandy.
