Qyzylorda oblysynyń turǵyny mal izdeýge shyǵyp, joǵalyp ketken

QYZYLORDA. KAZINFORM - Qyzylorda oblysynda mal izdeýge shyǵyp, joǵalyp ketken adam eki kúnnen keıin tabyldy.

8 aqpanda Qarmaqshy aýdany Josaly kentiniń 2 turǵyny avtokólikpen mal izdeýge shyǵyp ketken. Sodan úıge qaıta oralmaǵan.

«Oqıǵa Josaly kentinen 80 shaqyrym jerdegi «Qyzǵaldaq» ýchaskesinde boldy. Іzdeý barysynda avtokólik buzylyp, ony jóndeý úshin kómek shaqyrý úshin eki azamattyń biri avtokólikten shyǵyp ketken. Sodan keıin qaıta oralmaǵan. Oqıǵa boıynsha arnaıy izdestirý toby quryldy. Nátıjesinde 10 aqpanda joǵalǵan azamat aman-esen tabyldy», - dep málim etti Qyzylorda oblystyq Tótenshe jaǵdaılar departamentinen.

Eske salsaq, budan buryn Qyzylorda oblysynda jolda qalyp qoıǵan 4 myń jolaýshyǵa kómek kórsetildi.

Aýa raıynyń qolaısyzdyǵynan «Samara-Shymkent» avtomobıl jolynyń Qyzylorda oblysy aýmaǵynda turyp qalǵan jolaýshylarǵa kómek kórsetildi.