Qyzylorda oblysynda kúıeýi otqa kúıgen áıeline denedegi terisinen kesip bergen
QYZYLORDA. KAZINFORM - Qyzylorda oblysynda kúıeýi otqa kúıip qalǵan áıeline denedegi terisinen berip, ony ólim aýyzynan aman alyp qaldy.
Oqıǵa 1989 jyly Jańaqorǵan aýdanyna qarasty Qyrkeńse eldi mekeninde bolǵan. Sol ýaqytta 20 jastaǵy Qalamqas Mantaeva baıqaýsyzda janyp jatqan otqa kúıip qalady. Dárigerler kúıeýine áıeliniń denesiniń jartysyna jýyǵy jaraqat alǵanyn jetkizedi. Kúıiktiń ornyn ketirý úshin basqa adamnyń denesiniń terisi qajet ekenin aıtady.
- Bul sátte esh oılanbastan áıelime kómek qolyn sozýǵa sheshim qabyldadym. Áıelim oqys oqıǵa bolǵan ýaqytta ústine sıntetıka kóılek kıip alǵan eken. Kóılektiń shetine ot tıip, ol laýlap janbaı denesiniń ár jerin jaraqattaǵan. Denege jabysyp qalǵan. Dárigerlerdiń salǵyrttyǵynan kóılekti almastan ústinen dárine jaǵa bergen. Saldarynan áıelimniń jaraqaty odan saıyn asqynyp, terisine qatty zaqym keldi. Aýrýhanada toǵyz aı emdeldi. Sonyń alty aıynda tósekte jatty. Qıyn sátte qasynan uzaǵan joqpyn. Qajet bolǵannan keıin eki aıaǵymnan teri berdim. Sol arqyly áıelimniń denesiniń kúıip qalǵan jerleri qaıtadan qalpyna kele bastady. On-on bes kúnde terisi jazyldy. Odan buryn ekeýimiz birneshe jyl boıy balaly bola almaı júrgen edik. Tilegimiz qabyl bolyp, odan keıin eki ul, úsh qyz dúnıege keldi. Osylaısha qazir urpaǵymyz kóbeıip, solardyń qyzyǵyn kórip otyrǵan jaıymyz bar. Keıinnen áıelimdi emdegen aýrýhana dárigerlerine taǵy bár márte qaralǵan edik. Olar bizdiń bizdiń balaly bolǵanymyzǵa tańǵaldy, - dedi Marat Mantaev.
Qazir Marat Mantaev aýylda kásipkerlikpen aınalysady. Óz qarjysyna aýyldan sport keshenin salyp berdi. Oǵan qosa jergilikti turǵyndardyń balalaryna arnalǵan balabaqsha ashty. Balabaqshaǵa áıeli basshylyq jasaıdy. Balalary qoǵamnyń túrli salasynda mamandyqtaryna saı qyzmet atqaryp keledi.
Eske salsaq, budan buryn Qyzylorda oblysynda kúıeýi áıeline bir búıregin berdi.