Qyzylorda oblysynda kúrish jınaý naýqany bastaldy
QYZYLORDA. KAZINFORM – Sý resýrstary jáne ırrıgatsııa mınıstri Nurjan Nurjigitov Qyzylorda oblysynyń Jalaǵash aýdanynda ótken «Dala kúni – 2025» kúrish orý naýqanynyń ashylý rásimine qatysty. Іs-sharaǵa sondaı-aq óńir basshysy Nurlybek Nálibaev ta qatysty.
Jıynda aýyl sharýashylyǵy men sý salasynyń úzdik qyzmetkerleri marapattaldy. Barlyǵy 35 maman marapatqa ıe boldy. Sonymen qatar aýyl sharýashylyǵy jármeńkesi uıymdastyrylyp, óńir dıqandary óz ónimderin usyndy.
– Bıyl vegetatsııa kezeńi kúrdeli aýa raıy jaǵdaıynda ótti. Soǵan qaramastan, sýdy ádil ári tıimdi bólý sharalarynyń nátıjesinde Qyzylorda oblysyndaǵy kúrish alqaptaryn sýmen qamtamasyz ettik. Degenmen sý únemdeý tehnologııalaryna kóshý qajettiligi áli de ózekti. Memleket zamanaýı sýarý júıelerin jyldam ári tıimdi engizý úshin barlyq qajetti qoldaý tetikterin, sonyń ishinde sýbsıdııalardy usynyp otyr, - dedi Sý resýrstary jáne ırrıgatsııa mınıstri Nurjan Nurjigitov.
2025 jylǵy vegetatsııa kezeńinde «Qazsýshar» RMK Qyzylorda fılıaly sýarmaly sýdy jetkizý boıynsha 1042 kelisimshart jasasty. Óńirde sýarýǵa alynǵan sý kólemi – 3,51 mlrd tekshe metr.
Egis alqaptaryn turaqty sýmen qamtamasyz etý úshin oblystaǵy «Qazsýshar» fılıaly men jergilikti sharýa qojalyqtarynyń kúshimen 357 sorǵy stantsııasy ornatyldy. Onyń ishinde 60-y – fılıaldyń esebinen, qalǵan 297-si – jergilikti atqarýshy organdardyń, TJM-niń jáne dıqandardyń sorǵy stantsııalary.
Sý resýrstary jáne ırrıgatsııa mınıstrliginiń arnaıy jumys toby sý sharýashylyǵy jaǵdaıyna, kanaldar men sý qoımalarynyń jaı-kúıine, sýdyń bólinýine jáne sýarý kestesiniń saqtalýyna turaqty monıtorıng júrgizdi. Resýrstardy únemdeý maqsatynda kollektorlyq-drenajdy sýdy qaıta paıdalaný tásili qoldanyldy.
Sonymen qatar Qyzylorda oblysynyń dıqandary sý únemdeý tehnologııalaryn belsendi qoldana bastady. Búgingi tańda aımaqtaǵy shamamen 75 myń gektar jer sý únemdeý júıelerimen qamtylyp otyr.
Júrgizilgen keshendi sharalardyń nátıjesinde vegetatsııa kezeńiniń qalypty ótýine qajetti jaǵdaı jasaldy.
Buǵan deıin qyzylordalyqtar kúrish orý naýqanyna daıyndalyp jatqanyn jazǵan edik.