Qyzylorda oblysynda kúrish jınaý bastaldy

ASTANA. KAZINFORM - Aýyl sharýashylyǵy mınıstri Aıdarbek Saparov egin jınaý naýqanyn bastaý rásimine qatysty, dep habarlaıdy QR AShM baspasóz qyzmeti. 

Іs-shara Qyzylorda oblysynda ótken respýblıkalyq semınar-keńes aıasynda ótti. Aıdarbek Saparov óńirdiń kúrish óndirisinde tarıhı kóshbasshy bolyp tabylatynyn atap ótti.

Bıylǵy jyly Úkimet egis jáne egin jınaý naýqanyn qarjylyq jáne materıaldyq-tehnıkalyq qamtamasyz etýdiń barlyq máselelerin sheshti.

Alǵash ret kóktemgi egis jáne egin jınaý jumystaryna jeńildikpen kredıt berý kólemi 580 mlrd. teńgeni qurap, jyldyq “taza” 5%-ben berildi. 334 mlrd. teńge ıgerildi.

"Prezıdenttiń tapsyrmasy boıynsha bıyl tyńaıtqyshtar engizý boıynsha úlken jumys júrgizildi. Máselen, eger ótken jyl ishinde 679 myń tonna engizilse, qazirgi ýaqytta ǵana 1,2 mln.tonna satyp alyndy.

Bul rette Qyzylorda oblysy tyńaıtqyshtar engizý boıynsha kóshbasshy bolyp tabylady. Jospar boıynsha 63,3 myń tonnaǵa 100% úles qosyldy", - dedi Aıdarbek Saparov agrarshylarǵa egin jınaý naýqanynyń sátti aıaqtalýyn tilep.

Aǵymdaǵy jyly óńirdiń fermerleri jarty mıllıon tonnadan astam kúrish jınaýdy josparlap otyr.

Іs-shara barysynda óńirlik aýyl sharýashylyǵy kooperatıvteri men ónim óndirýshiler arasynda memorandýmdarǵa qol qoıyldy.

Qol jetkizilgen ýaǵdalastyqtarǵa sáıkes óńirlerdiń turaqtandyrý qorlaryna 1000 tonnadan astam kúrish pen tuz jetkiziletin bolady.

Bul ónimder ishki naryqty qanyqtyrady jáne kúrish pen tuz baǵasynyń turaqtanýyn qamtamasyz etedi.