Qyzylorda oblysynda kúrish kólemi 10,9 myń gektarǵa qysqarady
QYZYLORDA. KAZINFORM – Qyzylorda oblysynda bıyl 185,8 myń gektar jerge aýyl sharýashylyǵy daqyldaryn egý josparlanyp otyr. Bul týraly oblystyq aýyl sharýashylyǵy jáne jer qatynastary basqarmasynyń baspasóz qyzmeti habarlady.
Egis aýmaǵynda ótken jylǵydan 0,8 myń gektarǵa, onyń ishinde kúrishtiń kólemi 10,9 myń gektarǵa qysqarmaq. Osylaısha tek 70 myń gektar jerge Syr salysy egiledi. Sáýir aıynda memleketaralyq sý sharýashylyǵyn úılestirý komıssııasynyń otyrysy ótedi, sonda lımıt qaıta bekitilip, bul kórsetkish ózgerýi múmkin.
– 2026 jyldyń kóktemgi egisine oblys boıynsha 20,4 myń tonna kúrish tuqymy quıyldy. Odan basqa 1570,9 tonna dándi, 126,6 tonna maıly jáne 301,6 tonna mal azyǵy túrindegi daqyldardyń tuqymy daıyndaldy. 65,6 myń tonna mıneraldy tyńaıtqysh qajet bolsa, búginde sonyń 13%-y satyp alyndy. Sonymen qatar 85,8 myń lıtr gerbıtsıd jetkiziledi. Qolda bar 3975 tehnıka naýryz aıyna deıin tolyq jóndeýden ótkiziledi, - delingen habarlamada.
Aýyl sharýashylyǵy taýaryn óndirýshiler egis jumysyna 21,8 myń tonna arzandatylǵan dızel otynyn suraǵan. Búgingi kúni basqarma ony jetkizip berýshi operatorlardy anyqtap jatyr.
Aýyl sharýashylyǵy mınıstri Aıdarbek Saparov buǵan deıingi Úkimet otyrysynda bıyl sýdy kóp qajet etetin daqyldardyń lımıti qalaısha bekitilgenin málim etken edi.