Qyzylorda oblysynda kúrish egisi sáýirde bastalady
QYZYLORDA. KAZINFORM - Qyzylorda oblysynda bıyl 187 myń gektarǵa aýyl sharýashylyǵy daqyldaryn egý josparlanyp otyr. Onyń ishinde kúrish kólemi 83,9 myń gektardy quraıdy.
Oblysta egis kólemi Syrdarııa ózeni arqyly keletin sýdyń deńgeıine tikeleı qatysty. Búginde «Shardara» sý qoımasyndaǵy sý kólemi 4,6 mlrd tekshe metrdi quraıdy. Qoımaǵa joǵary bólikten sekýndyna 1 216,8 metr kýb sý túsip jatyr. Tómengi bólikke sekýndyna 500 tekshe metr sý jiberilýde. Byltyr dál osy kezeńde ol 800 tekshe metrdi quraǵan edi. Al «Kóksaraı» sý rettegishinde qazir 921,4 mln tekshe metr sý jınaqtalǵan. Oblys shekarasyna Kóktóbe sý beketi arqyly sekýndyna 240 tekshe metr sý kelýde.
Syrdarııa ózenindegi sý jaǵdaıyna baılanysty «Qazsýshar» RMK fılıalynyń boljamdy esebi boıynsha bıyl oblysta aýyl sharýashylyǵy daqyldaryn 187 myń gektarǵa egý boljanýda. Onyń ishinde kúrish kólemi - 83,9 myń gektar.
Oblystyq aýyl sharýashylyǵy jáne jer qatynastary basqarmasynyń málimetine súıensek, dándi daqyldar - 93,7, maıly daqyldar - 5, mal azyqtyq daqyldar - 71, kartop, kókónis, baqsha - 17,3 myń gektarǵa josparlanyp otyr. Bıylǵy jyldyń egisi úshin byltyr kúz mezgilinde aýyl sharýashylyǵy qurylymdary tarapynan 3,7 myń gektar kúzdik bıdaı egilip, 50,6 myń gektar súdiger aıdaý qamtamasyz etildi.
«Oblysta azyq-túlik qaýipsizdigin qamtamasyz etý maqsatynda tıisti is-sharalar qolǵa alynǵan. Bul baǵytta jergilikti turǵyndar ózin-ózi áleýmettik mańyzy bar kartop, kókónis, baqsha ónimderimen daıyndaýy úshin qosymsha jer daıyndaýǵa mán berilip otyr. Osy oraıda oblys basshylyǵy tarapynan Qyzylorda qalasy men aýdan ákimderine tıisti tapsyrma berilgen. Kóktemgi egiske oblys boıynsha 21 304 tonna kúrish tuqymy quıyldy. Onyń ishinde quıylǵan kúrish tuqymynyń 25 tonnasy - kóbeıtilgen tuqym, 48,4 tonnasy sýper elıta, 448,5 tonnasy elıta, qalǵany І-ІІІ reprodýktsııaly tuqymdy quraıdy. Sondaı-aq, bıylǵy egiske oblys boıynsha 992 tonna jazdyq, 736 tonna kúzdik bıdaı, 58,4 tonna arpa, 10,8 tonna tary, 67,6 tonna dándik júgeri, 5,0 tonna kúnbaǵys, 107 tonna maqsary, 13,5 tonna soıa, 21,8 tonna súrlemdik júgeri jáne 298 tonna jońyshqa tuqymy jınaqtalǵan. Egiske qajetti 61,0 myń tonna mıneraldyq tyńaıtqyshtyń 38,1 myń tonnasy satyp alyndy. Sharýashylyqtar mıneraldyq tyńaıtqyshtardy jetkizýshi mekemelermen kelisim-shart jasaý arqyly satyp alynýda», - dep málim etti Qyzylorda oblystyq aýyl sharýashylyǵy jáne jer qatynastary basqarmasynan.
Qoldaǵy málimetke súıensek, bıyl sharýashylyq qurylymdarynyń esebindegi barlyǵy 3799 aýyl sharýashylyǵy tehnıkalary kóktemgi dala jumystaryna qatysady. Olardyń 3325-i qazirge deıin jóndeýden ótkizildi. Byltyr 9,3 mlrd, teńgeni quraıtyn 253 aýyl sharýashylyǵy tehnıkasy satyp alynyp, mashına-traktor parki 4,5%-ǵa jańartyldy. Kóktemgi egis egý jáne dala jumystaryn júrgizýge 12,9 myń tonna arzandatylǵan dızel otyny bólinip otyr.
«Arzandatylǵan dızel otynyn óńirge jetkizýshi óńirlik operatorlardy aıqyndaý maqsatynda oblystyq komıssııanyń 1 aqpany kúni ótkizilgen otyrysynda 4 operatorlar aıqyndaldy. Olardyń qatarynda «Jibek joly LTD» JShS, «RK Munaı» JShS, «Jańaqorǵan OIL» JShS, «Petro Retail» JShS bar. Bekitilgen kestege sáıkes aqpan aıyna bólingen 3,5 myń tonnasyna jergilikti operatorlar arqyly tolyqtaı kelisim-shart jasalyp, onyń 3,1 myń tonnasyna qarjysy tólendi. Qazirge deıin zaýyttan 2,4 myń tonnasy tıelip, oblysqa 953,5 tonnasy jetkizildi. Osy jetkizilgen dızel otynynyń búgingi kúnge 640,3 tonnanyń 1 lıtrin 247-250 teńge aralyǵynda sharýashylyqtarǵa bosatylýda. Kóktemgi dala jáne egin egý jumystarynyń atqarylý barysy turaqty baqylaýda», - dep tolyqtyrdy oblystyq aýyl sharýashylyǵy jáne jer qatynastary basqarmasynan.
Basty daqyl kúrish egý jyldaǵy dástúr boıynsha sáýir aıynda bastalady dep kútilýde. Dıqandar tarapynan oǵan barlyq ázirlik jumystary qolǵa alynyp otyr.
