Qyzylorda oblysynda qurylysy uzap ketken jol boıynsha tekserý júrip jatyr

QYZYLORDA. KAZINFORM - Qyzylorda oblysynda eki bıýdjet qarajatyn jymqyrýdyń táýekeli belgili boldy. Bul derekterdi QR Qarjylyq monıtorıng agenttiginiń Qyzylorda oblysy boıynsha ekonomıkalyq tergep-tekserý departamentiniń mamandary anyqtady.

Áleýmettik jelide turǵyndardyń 2020 jyldyń qazan aıynda qaıta jańartý bastalǵan Qazaly aýdany aýmaǵyndaǵy «Qazaly-Áıteke bı» aýdandyq mańyzy bar avtomobıl jolynyń aıaqtalýy uzap ketkenine narazy ekeni anyqtaldy.

«Kelisim-sharttyń quny – 2,69 mlrd teńgeni quraıdy, onyń 71% ıgerilgen. Degenmen taldaý nátıjesiniń arqasynda taldaý ázirlemeler toby jalpy somasy 456,4 mln teńgege jalǵan shot-faktýra jazý arqyly bıýdjet qarajatyn urlaý táýekelin belgiledi. Departament munymen ári qaraı anyqtaý jumystaryn jasaıdy», - dep atap ótti departament basshysy Aslan Keńes.

Vedomstvo málimetinshe, departament osyǵan uqsas taǵy bir jaǵdaıdy anyqtady.

«Aral aýdanyna qarasty Toqabaı, Abaı eldi mekenderin sýmen jabdyqtaý jáne Aral-Toqabaı toptyq sý qubyrynyń Aral-Toqabaı-Abaı qosylý tarmaǵynyń qurylysy (bastapqy jobanyń quny – 3.22 mlrd teńge), Qazaly aýdanynyń Baıqoja toptyq sý qubyryn sýmen jabdyqtaý júıesin qaıta jańartý jumystaryna (jobanyń quny-2.2 mlrd teńge) taldaý júrgizdi. Nátıjesinde eki nysan boıynsha 655,6 mln teńgege bıýdjet qarajatyn jymqyrý táýekeli anyqtaldy», - dep tolyqtyrdy sózin departament basshysy.

Eske salsaq, budan buryn Qyzylordada sharýalarǵa ońdy-soldy berilgen 90 mln teńge sýbsıdııa qaıtaryldy.