Qyzylorda oblysynda qurǵaqshylyq qaıtalanýy múmkin be
QYZYLORDA. KAZINFORM — Bıyl Qyzylorda oblysynda vegetatsııalyq kezeń qalaı ótip jatyr? Syrdarııa ózenindegi sý deńgeıi qandaı? Sý tapshylyǵy qaıtalanýy múmkin be? Kazinform tilshisiniń suraqtaryna Sý resýrstaryn retteý, qorǵaý jáne paıdalaný jónindegi Aral-Syrdarııa basseındik ınspektsııasy resmı túrde jaýap berdi.
Inspektsııa basshylyǵy málimdegendeı, Sý resýrstary jáne ırrıgatsııa mınıstrligi kúrdeli gıdrometeorogııalyq jaǵdaıǵa qaramastan egindi qajet kólemde sýarý úshin barlyq múmkindikti jasap otyr.
— 2025 jylǵy vegetatsııalyq kezeńniń basynda elimizdegi sý qoımalary orta eseppen 95%-ǵa toldy. Jalpy, vegetatsııalyq kezeńde Qyzylorda oblysyna 4,7 mlrd tekshe metr sý jetkizildi. Sý lımıti 3 mlrd tekshe metr bolyp belgilendi, biraq kanaldar arqyly odan kóp sý alyndy. Shardara sý qoımasyna keletin sý kólemi azaıdy. Degenmen, egin sýarý maýsymyn aıaqtaý úshin qosymsha 350-400 mln tekshe metr jetkiziledi. Ońtústik óńirlerde kanaldar arqyly kezekpen sý berý kestesi bekitildi. Qyzylorda oblysyna 53 sorǵy jetkizý jóninde kelisim jasaldy, — dedi ınspektsııa basshysynyń orynbasary Seıitqasym Ábýov.
Shardara sý qoımasynda osy kúni 235 mln tekshe metr sý bar. «Qazgıdromettiń» málimdeýinshe, qoımaǵa sekýndyna 200 tekshe metr, Syrdarııa ózeniniń tómengi aǵysyna 150 tekshe metr sý túsip jatyr.
— Ótken jyldyń jeltoqsanynan bastap bıylǵy sáýirge deıin Kóksaraı sý rettegishine 1451 mln tekshe metr sý jınaldy. Vegetatsııalyq kezeńde sonyń 1391 mln tekshe metri tómenge qaraı tastaldy. Kóksaraıda qalǵan sýdyń kólemi — 20,02 mln tekshe metr. Búgingi kúni oblystaǵy Kóktóbe sý beketi arqyly sekýndyna 270 tekshe metr, Qyzylorda sý torabynan 30 tekshe metr, Qazaly sý torabynan 5 tekshe metr, Aqlaq sý toraby arqyly 15 tekshe metr sý kelip jatyr. Sonymen qatar kanaldar Qyzylorda sý torabyna deıin sekýndyna 195 tekshe metr, Qazaly sý torabyna deıin 47 tekshe metr sý alynady, — dedi ınspektsııa basshysynyń orynbasary.
2025 jyldyń vegetatsııalyq (sáýir men qazan aılary aralyǵy) kezeńinde Shardaraǵa 3694 mln tekshe metr sý keledi dep boljanǵan. 12 tamyzǵa deıin sonyń 199 mln tekshe metri keldi. Mamandar bıyl jaýyn-shashyn az túsip, aýa raıy qatty ystyq bolatynyn, ol qurǵaqshylyqqa ulasatynyn, sý tapshylyǵy qaıtalanýy múmkin ekenin topshylap otyr.
Aıta keteıik, bıyl Qyzylorda oblysynda vegetatsııalyq kezeń kúrdeli jaǵdaıda ótip jatyr.