Qyzylorda oblysynda kúnine 50-55 sábı dúnıege keledi

QYZYLORDA. KAZINFORM – Qyzylorda myń turǵynǵa shaqqandaǵy týý kórsetkishi jóninen óńirler arasynda tórtinshi orynda tur. Bul týraly oblystyq statıstıka departamenti málimdedi.

Azamattyq hal aktileri jazbasyndaǵy málimetke súıensek, 2025 jylǵy qańtar men mamyr aıy aralyǵynda aımaqta 6739 sábı dúnıege kelgen. Onyń 3454-i – ul bala, 3285-i – qyz bala.

– Qyzylorda oblysynda týý kórsetkishi jáne tabıǵı ósim turaqty. Oblystar arasynda 1000 turǵynǵa shaqqandaǵy týý kórsetkishi boıynsha tórtinshi oryndamyz. Statıstıkaǵa qarasaq, óńirde kúnine ortasha eseppen 50-55 sábı dúnıe esigin ashady. Aı saıyn 1550-1600 balaǵa deıin dúnıege keledi, - dedi departament basshysynyń orynbasary Aıbek Ábildaev. 

Onyń aıtýynsha, halyqtyń ortasha jasy – 29,8 jas, ıaǵnı bosanatyn jastaǵy áıelder sany kóp. 

– Bir qýanarlyǵy, 5-6, tipti 7-shi perzentin dúnıege ákelgen altyn qursaqty analardyń da sany keıingi kezde artyp otyr, - dedi Aıbek Ábildaev. 

Eske salaıyq, bala týǵanda beriletin járdemaqyny 2025 jyldyń basynan bastap elimizde 117 myń adam aldy.