Qyzylorda oblysynda kóship kelgenderden ketkender sany eki ese kóp

QYZYLORDA. KAZINFORM — Qyzylorda oblystyq statıstıka departamentiniń 1 qazandaǵy málimetinshe, óńir turǵyndarynyń sany 845,9 myń adamǵa jetti. Onyń 53%-y aýylda, 47%-y qalada turady. 

Aımaqta keıingi 5 jylda halyq sany 42,6 myńǵa ósken.

— Halyqtyń kóshi-qony áleýmettik, ekonomıkalyq, saıası, ekologııalyq jáne syrtqy faktorlarǵa sáıkes ózgerip turady. Kóshi-qon qyzmeti organdary usynǵan málimetterdi óńdeý nátıjesinde belgili bolǵany, 2025 jyldyń qańtar-qyrkúıegi aralyǵynda oblysymyzǵa turǵylyqty turýǵa kelgen 10102 adam tirkelgen. Al aımaqtan ketkenderdiń sany — 19505 adam. 2024 jyldyń qańtar-qyrkúıegimen salystyrǵanda oblysqa kelgender sany 20,6%-ǵa kóbeıgen, — dedi departament basshysynyń orynbasary Ásel Dosjanova. 

Ótken 9 aıda oblysta 12599 sábı dúnıege kelgen. Onyń 6483-i — ul, 6116-sy — qyz.

— Óńirdiń týý kórsetkishi jáne tabıǵı ósimi turaqty. Oblystar arasynda 1000 turǵynǵa shaqqanda týý kórsetkishi boıynsha Qyzylorda turaqty tórtinshi orynda, — dedi Ásel Dosjanova. 

Eske salsaq, Statbıýro bergen aqparatqa sáıkes, 2025 jylǵy 1 qazanda Qazaqstan halqynyń sany 20 445 231 adamǵa jetken.