Qyzylorda oblysynda Konstıtýtsııa kúni atalyp ótti
ASTANA. KAZINFORM - Qyzylorda oblysynyń ákimi Nurlybek Nálibaev Konstıtýtsııa kúnine arnalǵan saltanatty jıynǵa qatysyp, jerlesterin merekemen quttyqtady, dep habarlaıdy Qyzylorda oblysy ákiminiń baspasóz qyzmeti.
Syr óńiri jurtshylyǵy táýelsizdik pen tutastyqtyń kepili retinde el birligin bekemdegen, turaqtylyq pen tatýlyqtyń tutqasy bolǵan Ata Zań qabyldanǵan kúndi aıryqsha atap ótti.
Merekelik sharada Óner ortalyǵyna jınalǵan 1000 adam Memlekettik Ánurandy oryndady. Qasıetti Otanymyzdyń, týǵan jerimizdiń, eńbekpen eseıgen erlerdiń dańqyn asqaqtatqan Ánuranymyz kókke qalyqtady.
«Memleket basshysy Qasym-Jomart Kemeluly: «Bul – elimiz úshin aıryqsha mańyzdy mereke. Ata Zańymyz – memlekettigimizdiń tuǵyry berik bolýyn qamtamasyz etetin eń basty qujat. Onyń árbir tarmaǵy múltiksiz oryndalsa ǵana ádildik pen zań ústemdigi ornyǵady», – degen bolatyn.
"Prezıdentimizdiń bastamasymen ótken referendýmda halyq aýqymdy konstıtýtsııalyq reformaǵa biraýyzdan qoldaý kórsetti. Ata Zańǵa mańyzdy ózgerister men tolyqtyrýlar engizildi. Bul ózgerister memlekettik basqarý modelin jańǵyrtýǵa birden-bir negiz boldy. Halqymyzdyń ál-aýqaty artyp, el ekonomıkasy odan ári damydy. «Ádiletti Qazaqstan» degenimiz – barlyq adamǵa teń múmkindik berý, eldiń saıası ómirine belsene aralasatyn myqty azamattyq qoǵamy bar, tıimdi ári órkenıetti memleket qurý.
Búginde egemen elimizde, sonymen qatar, óńirimizde barlyq salada nátıjeli jumystar atqarylýda. Prezıdentimizdiń qoldaýymen oblys, aýdan ortalyqtary qarqyndy qurylys alańyna, órkendi ózgerister ordasyna aınaldy. Aımaqta 187 nysannyń qurylysy salynýda. Bul bastamalar azamattardyń quqyqtary men bostandyqtaryn qamtamasyz etýge, sapaly bilim, qoljetimdi medıtsınalyq qyzmet alýyna, jaıly turmysqa qajetti ıgilikterdi paıdalanýyna baǵyttalǵan», – dedi aımaq basshysy.
Saltanatty is-sharada óńirdiń damýyna úles qosqan birqatar azamatqa marapat tabystaldy.
