Qyzylorda oblysynda kólik qozǵalysyna shekteý qoıyldy

QYZYLORDA. KAZINFORM - Aýa raıynyń qolaısyz bolýyna baılanysty «Qyzylorda-Pavlodar-Ýspenka» avtomobıl jolynyń birqatar bóligine shekteý qoıyldy.

Búgin, 10 naýryzda saǵat 08.40-tan bastap respýblıkalyq mańyzy bar «Qyzylorda-Pavlodar-Ýspenka» avtomobıl jolynyń 12-216 shaqyrym aralyǵyna kóliktiń barlyq qozǵalysyna ýaqytsha shekteý qoıyldy.

«Ulytaý oblysynda aýa raıy nasharlaýy baıqalyp tur. Jańbyrdan keıin joldyń joǵarǵy qabaty buzylǵan. Osyǵan baılanysty respýblıkalyq mańyzy bar «Qyzylorda-Pavlodar-Ýspenka» avtomobıl jolynyń Qyzylorda qalasynyń shekarasynan bastap Ulytaý oblysynyń shekarasyna deıingi aralyqta kóliktiń barlyq qozǵalysyna ýaqytsha shekteý qoıyldy», - dep málim etti Qyzylorda oblystyq Tótenshe jaǵdaılar departamentinen.

Eske salsaq, budan buryn jańbyrdan keıin Aral qalasynyń kóshelerin sý basty.