Qyzylorda oblysynda qyzanaqty qaıta óńdeıtin zaýyt salynady
ASTANA. KAZINFORM - Qyzylorda oblysynyń Jańaqorǵan aýdanynda qyzanaq pastasyn óndiretin kásiporyn iske qosý josparlanyp otyr, dep habarlaıdy QR Aýyl sharýashylyǵy mınıstrliginiń baspasóz qyzmeti.
Baspasóz qyzmetiniń málimetterine qaraǵanda, «Alpecon Group» kompanııasy kásiporyndy jańǵyrtyp, aýyl sharýashylyǵy ónimderin tereń óńdeýge arnalǵan zamanaýı óndiris oryndaryn qurýǵa 2,3 mlrd teńge ınvestıtsııa salýdy kózdep otyr.
Joba aıasynda «ATMO AGRO» JShS-niń óndiristik nysandaryn satyp alyp, tehnologııalyq jabdyqtardy jańartý, óndiristik jáne qosalqy nysandardy jóndeý, sondaı-aq arnaıy tehnıka satyp alý josparlanyp otyr. Kásiporyn jańǵyrtylǵannan keıin táýligine 600 tonnaǵa deıin qyzanaq óńdeı alady.
Kásiporyndy qajetti shıkizatpen turaqty qamtamasyz etý úshin ınvestor qyzanaq ósirýge arnalǵan shamamen 2 300 gektar sýarmaly jerdi ıgerýdi josparlap otyr. Sonymen qatar Túrkistan oblysynyń aýyl sharýashylyǵy taýaryn óndirýshilerinen shıkizat satyp alý kózdelgen.
Bul rette joba qyzanaqty ósirý, ony qaıta óńdeý jáne daıyn ónim óndirýdi birtutas óndiristik júıege biriktirýge múmkindik beredi.
-Jobanyń negizgi mańyzy – aýyl sharýashylyǵy ónimderin qaıta óńdeý kólemin ulǵaıtyp, olardyń qosylǵan qunyn arttyrý. Otandyq qyzanaq pastasyn óndirý ımportty almastyrýǵa jáne Qazaqstanda óndiriletin ónim túrlerin kóbeıtýge múmkindik beredi,-delingen habarlamada.
Osyǵan deıin elimizde qyzanaq ımportyna ýaqytsha shekteý qoıylǵany týraly jazdyq.
