Qyzylorda oblysynda kenege qarsy óńdeletin eldi mekender sany azaıdy
QYZYLORDA. KAZINFORM — Qyzylorda oblysynda kenege qarsy kóktemgi zalalsyzdandyrý jumysy bastaldy. Ol mamyr-maýsym aılarynda eki kezeń boıynsha júrgiziledi.
Qyzylorda óńiri Kongo-Qyrym gemorragııalyq qyzbasy aýrýynyń tabıǵı oshaǵynda ornalasqan. Oblystyq sanıtarııalyq-epıdemıologııalyq baqylaý departamentiniń málimetinshe, jyl basynan beri sanıtarııalyq-profılaktıkalyq, daıyndyq sharalary belsendi túrde júrgizilip keledi. Oblys ákimdiginiń 2026 jylǵy 13 aqpandaǵy № 25 qaýlysyna sáıkes kenege qarsy óńdelýi tıis 74 eldi mekenniń tizimi esepke alyndy. Al byltyr qolaısyz eldi mekender sany 111 bolatyn. Dárilenetin aýmaqtar Aral, Jańaqorǵan jáne Shıeli aýdandarynda kóptep tirkelip otyr.
— Janýarlardy, mal qoralaryn, sýat-shańlaqtardy merdigerler óńdese, Ulttyq saraptama ortalyǵy oblystyq fılıalynyń mamandarynan jasaqtalǵan brıgadalar eldi mekenderdiń aınalasynda sanıtarııalyq qorǵanysh aımaǵyn qurýmen aınalysady. Kóktemgi epıdemıologııalyq maýsym aldynda aýmaqtyń endemııalylyǵyn anyqtaý, qozdyrǵyshtyń aınalymyn baqylaý maqsatynda arnaıy jyljymaly zoologııalyq-parazıtologııalyq top jasaqtalyp, zerthanalyq zertteýge kene jınap jatyr. Bıyl 3 aıda barlaý jumysy barysynda 6656 kene jınaldy. Onyń 3904-i tabıǵattan, 1624-i janýarlardan, 1128-i eldi mekenderden jınalyp, zertteýge jiberildi. Jyl basynan beri kene shaǵý jaǵdaıymen 21 adam medıtsınalyq kómekke júginip, 14 kúnge medıtsınalyq baqylaýǵa alyndy. Kongo-Qyrym gemorragııalyq qyzbasy tirkelgen joq, — dedi departament basshysy Gúlmıra Syzdyqova.
Departament ókilderi epıdemıologııalyq maýsym aldynda turǵyndarǵa aýa raıynyń jylynýyna baılanysty tabıǵatqa demalysqa shyqqanda, egindikpen, mal sharýashylyǵymen aınalysý, balyq aýlaý kezinde nemese dalalyq jaǵdaıda eńbekpen shuǵyldanǵanda keneden barynsha saqtanýǵa shaqyrdy.
Buǵan deıin Shyǵys Qazaqstan oblysynda kún jylynǵaly beri kene shaqqandar sany kóbeıgenin jetkizgen edik.
