Qyzylorda oblysynda kelinine balaǵat sózder aıtyp, mazasyn alǵan áıel qamaýǵa alyndy

QYZYLORDA. KAZINFORM - Qyzylorda oblysynda kelinine balaǵat sózder aıtqan turǵyn jazalandy. Bul týraly oblystyq sot málimdedi.

«Aral aýdandyq sotynda azamatsha B.-ǵa qatysty Qazaqstan Respýblıkasynyń ÁQBtK-niń 73-babynyń 2-bóligimen ákimshilik quqyq buzýshylyq týraly is qaraldy. Sotta anyqtalǵandaı, azamatsha B. úıine alkogoldik ishimdik ishken mas kúıinde kelip, otbasy-turmystyq qatynastardaǵy adamdarǵa syılamaýshylyq kórsetip, kelinine balaǵat sózder aıtyp, mazasyn alyp, januıa shyrqyn buzǵan. Ol buǵan deıin 11 sáýir 2024 jyly osy tektes áreketi úshin ÁQBtK-niń 73-babynyń 1-bóligimen ákimshilik jazaǵa tartylyp, eskertý alsa da, esh nátıje shyǵarmaı, quqyq buzýshylyqty qaıtalap jasaǵan», - delingen sot habarlamasynda.

Sotta jábirlenýshi Á. mundaı jaǵdaıdyń jıi bolyp turatynyn kórsetip, oǵan jaza qoldanýdy suraǵan. B-nyń quqyq buzýshylyq áreketi óziniń kinásin moıyndaǵan jaýabymen, sondaı-aq sotta zerttelgen is qujattarymen tolyq dáleldengen.

Sot qaýlysymen B. joǵaryda atalǵan bappen kináli dep tanylyp, 10 táýlik merzimge ákimshilik qamaýǵa alý jazasy taǵaıyndaldy. Sonymen qatar APB-niń erekshe talap belgileý týraly usynysy qanaǵattandyrylyp, B-nyń minez-qulqyna 3 aı merzimge alkogoldik ishimdik ishýge, esirtki, psıhotroptyq zattardy qoldanýǵa tolyq kólemde tyıym salýdy mindetteıtin erekshe talap belgilengen.

Qyzylorda oblysynda bıyl beınekameralardyń kómegimen 122 qylmys ashylǵanyn jazǵan bolatynbyz.