Qyzylorda oblysynda qaıtys bolǵan balany taekvondo sektsııasyna tirkegen

QYZYLORDA. KAZINFORM – Qyzylordalyq prokýrorlar «Damubala» baǵdarlamasy aıasynda ashylǵan úıirmeler men sektsııalar jumysynan birqatar zańbuzýshylyqty anyqtady.

Mysaly, Jalaǵash aýdanynda qaıtys bolǵan balany taekvondo sektsııasyna, al tirek-qımyl júıesi buzylǵan balany zamanaýı bı úıirmesine tirkep paıda tapqan jaǵdaılar bar.

- Jarııa oferta shartyna sáıkes tapsyrys berýshi memlekettik tapsyrysty iske asyrý talaptarynyń saqtalýyn baqylaýy tıis bolǵan. Alaıda jekelegen ónim berýshiler dombyra, estradalyq vokal úıirmelerin 2020 jyldan beri beri qaraýsyz turǵan, órt qaýipsizdigi jáne sanıtarııa qaǵıdalaryna saı kelmeıtin úı-jaılarda ótkizgen. Baqylaýdyń bolmaýynan balalar talapqa saı kelmeıtin, adam ómiri men densaýlyǵyna qaýipti nysandarda tárbıelengen, - delingen oblystyq prokýratýranyń habarlamasynda.

Qadaǵalaýshy organ zań talaptarynyń saqtalmaýy memlekettik tapsyrysty qarjylandyrý máselesiniń durys josparlanbaýynan bastalǵanyn alǵa tartyp otyr.

- Sońǵy úsh jylda memlekettik tapsyrysty oryndaýǵa 11,6 mlrd teńge bólinip, 310 ónim berýshi qyzmet kórsetken. Jergilikti atqarýshy organ bıýdjet qarajatynyń maqsatty jumsalýyn qatań baqylamaǵan. Sonyń saldarynan ónim berýshilerge 500 mln teńgege jýyq qarjy negizsiz tólengen. Qazir memleketke 30-dan astam ónim berýshiden 91 mln teńge óndirildi, - delingen vedomstvo habarlamasynda.

Biz buǵan deıin Qyzylorda oblysynda memleketten qarjy alǵan shyǵarmashylyq úıirmeler tekserilip jatqanyn habarlaǵanbyz.