Qyzylorda oblysynda qarjy pıramıdasyn uıymdastyrýshynyń zańsyz áreketi áshkerelendi

QYZYLORDA. KAZINFORM — Tergeý barysynda «HRT» kompanııasynyń salymshylarǵa samokat satý jáne jalǵa berý arqyly paıda tapqany anyqtaldy. Bul týraly oblystyq ekonomıkalyq tergep-tekserý departamentinen habarlady. 

— Kompanııanyń aımaqtyq fılıalyn ashyp, paıda tabýdy kózdegen T.Teńelbaeva kompanııa qyzmetimen tolyq tanysyp, «Telegram» jelisindegi «Remo 888» akkaýnty arqyly keri baılanys ornatqan. Keıin «HRT» júıesine jańa salymshylardy tirkeý arqyly paıdasyn arttyrý josparyn qurǵan. Jańa qatysýshylardy tartqany úshin ol ár salymshydan 15 paıyz kóleminde syıaqy alyp kelgen. Osylaısha oblys aýmaǵynda qarjy pıramıdasyn uıymdastyryp, jalpy kólemi 33 mln teńgeden astam materıaldyq shyǵyn keltirgen. 

Appelıatsııalyq sot úkimimen T. Teńelbaeva QR QK-niń 217-baby 3-bóliginiń 2-tarmaǵymen jáne QK-niń 218-baby 1-bóliginde kózdelgen qylmystardy jasaǵany úshin kináli dep tanylyp, 6 jyl merzimge bas bostandyǵynan aıyryldy. Oǵan QK-niń 74-babynyń 1-bóligi qoldanylyp, aıyptalýshynyń kámeletke tolmaǵan balalary bolýyna baılanysty 5 jyl merzimge keıinge qaldyrylǵan, - delingen departament habarlamasynda. 

Jábirlenýshilerge zalaldy óteý úshin sottalýshy qylmystyq jolmen 5 mln 604 myń teńgege satyp alynǵan «Changan Alsvin» avtokóligi tárkilendi.

QR Qarjy naryǵyn retteý jáne damytý agenttigi buǵan deıin qarjy pıramıdasy, onyń belgileri jáne alaıaqtardan qalaı saqtaný kerektigi jónindegi keńesterin usyndy.

Eske salsaq, buǵan deıin qarjy pıramıdasyn qalaı tanýǵa jáne alaıaqtardan qalaı qorǵanýǵa bolatynyn jazǵan edik.