Qyzylorda oblysynda qar qursaýynda qalǵan jolaýshylar qutqaryldy

QYZYLORDA. KAZINFORM – Qyzylorda oblysy Shıeli aýdany aýmaǵyndaǵy Qarataý betkeıinde 1 aqpanda aýa raıynyń qolaısyzdyǵy baıqaldy. Qutqarýshylar Saýysqandyq asýynda qalyp qoıǵan 12 júk jáne 2 jeńil kóligindegi 14 jolaýshyny qutqardy. 

Qyzylorda oblysy Tót enshe jaǵdaılar departamentine 1 aqpanda saǵat 00.00 shamasynda habarlama kelip tústi. Onda Shıeli aýdanyndaǵy Qarataý betkeıinde ornalasqan «Shıeli-Taıqońyr» tas jolynda aýa raıynyń qolaısyzdyǵyna baılanysty adamdar qalyp qoıǵandyǵy aıtylǵan.

«Oqıǵa ornyna Shıeli aýdanynyń tótenshe jaǵdaılar bóliminiń aǵa ınjeneri azamattyq qorǵaý aǵa leıtenanty Nurperzent Musahan, №13 órt sóndirý bóliminen barlyǵy 8 qyzmetker jolǵa shyqty. Saýysqandyq asýy Shıeli kentinen shamamen 70 shaqyrym jerde jatyr. Qutqarýshylar jergilikti mańyzdaǵy «Shıeli-Taıqońyr» tas jolynyń 30-60 shaqyrymy aralyǵyndaǵy Saýysqandyq asýynda 12 tehnıkadaǵy 14 jolaýshynyń qalyp qoıǵanyn anyqtady. Barlyǵy eresek adamdar», - dep málim etti Qyzylorda oblystyq tótenshe jaǵdaılar departamentinen. 

Aýa raıynyń qolaısyzdyǵy, qardyń qalyń bolýyna baılanysty jolda turyp qalǵan.

Sondaı-aq, Saýysqandyq asýyna barar jolda qar qursaýynda qalǵan «GAZel» markaly avtokólikti qutqarý maqsatynda qardy ashý jumysyn júrgizildi. 

«Jolaýshylar «Shıeli-Taıqońyr» avtojolynda ornalasqan jylytý pýnktine ornalastyryldy. Azamattardyń densaýlyǵy men ómirine eshqandaı qaýip tóngen joq. Evakýatsııalanǵan azamattar azamattyq qorǵaý organdarynyń mamandaryna alǵys bildirdi», - dep tolyqtyrdy departamentten.

Eske salsaq, budan buryn Qyzylorda oblysynda «Samara-Shymkent» tasjoly jabyldy.

Vıdeo - Qyzylorda oblystyq tótenshe jaǵdaılar departamenti