Qyzylorda oblysynda qandaı joldar asa qaýipti ekeni belgili boldy

QYZYLORDA. KAZINFORM – 2025 jyldyń alǵashqy jartysynda jol qozǵalysyn qamtamasyz etý jáne jol-kólik oqıǵalarynyń aldyn alý baǵytynda Qyzylorda oblysynda 144 164 ákimshilik quqyqbuzýshylyq anyqtaldy. Onyń 81 209-y – jol erejesine tikeleı áser etetin óreskel jaǵdaılar.

Tártip saqshylary monıtorıng barysynda oblys aýmaǵynda qandaı joldar kólik júrgizýshiler úshin asa qaýipti ekenin anyqtady.

— Adam ólimimen aıaqtalatyn jol-kólik oqıǵalarynyń basym kópshiligi Qarabutaq-Qyzylorda-Shymkent tas jolynyń Qyzylorda-Aqtóbe baǵytynda tirkeledi. Onyń 566 shaqyrymy ekinshi dárejeli bolsa, Qyzylorda-Túrkistan baǵytyndaǵy joldyń 541 shaqyrymy birinshi dárejeli. Qaıǵyly jaǵdaılarǵa osy sebep áser etip otyr. Sonymen qatar sheteldikterdiń kóbi tranzıttik joldarda ereje saqtaı bermeıdi. Mysaly, esepti kezeńde 6 jol-kólik oqıǵasynan 7 adam kóz jumyp, 11 adam jaraqat alǵan. Onyń arasynda Reseı, Qyrǵyzstan, Ózbekstan, Tájikstan elderiniń azamattary bar, — dedi oblystyq polıtsııa departamenti jergilikti polıtsııa qyzmeti basqarmasy bastyǵynyń orynbasary Raýan Áldeshov.

Qyzylorda-Aqtóbe aralyǵyndaǵy respýblıkalyq mańyzy bar jol arqyly táýligine shamamen 10 myń kólik ótedi. Sońǵy bes jylda eki aralyqty jol qylǵan kólik sany 79,4%-ǵa ósken.

Buǵan deıin biz Qyzylordada jyldamdyqty baqylaýǵa arnalǵan «kózge kórinbeıtin» kameralardyń paıda bolǵany týraly aqparatty oblystyq polıtsııa departamenti rastaǵanyn habarlaǵanbyz.