Qyzylorda oblysynda ınvestorlar qyzmetine zańsyz aralasý tyıylmaı tur

QYZYLORDA. KAZINFORM – Qyzylorda oblystyq prokýratýrasy ınvestorlar men kásipkerlerdiń quqyqtaryn qorǵaý baǵytynda júıeli jumys atqaryp keledi. 

Bıyl ınvestorlardyń qyzmetine zańsyz aralasýdyń 25 deregin anyqtap, barlyǵyna tosqaýyl qoıdy. 

— Ótken jyly 600-ge jýyq bıznes sýbektisiniń qyzmetine zańsyz tekserý júrgizýge jol bergen joqpyz. Sondaı-aq 4 adam kásipkerlik qyzmetke zańsyz aralasqany jáne tekserý tártibin buzǵany úshin ákimshilik jaýaptylyqqa tartyldy, — dedi oblys prokýrory Rızabek Ojarov.

Oblys prokýrorlaryna ınvestorlardyń quqyqtaryn qorǵaý mıssııasy senip tapsyrylǵany belgili. Olardyń ótinishterin qaraý jáne týyndaǵan máselelerge jedel den qoıý maqsatynda arnaıy top quryldy. 

— Sońǵy úsh jylda biz tıimdiligin dáleldegen model qalyptastyrdyq. Júıeli ári nátıjeli jumys úshin naqty quraldar qoldanyldy. Ákimshilik qysymdy tejeýdiń alǵashqy osyndaı tetigi — «prokýrorlyq súzgi». Onyń qaǵıdaty boıynsha prokýrordyń kelisiminsiz ınvestorǵa qatysty birde-bir tekserý, aıyppul nemese talap-aryzdyń zańdy kúshi joq. Qazir biz árbir jobany onlaın-rejımde baqylaıyz, shaǵymdy kútpeı árbir táýekeldi aldyn ala kóremiz, — dedi oblys prokýrory.

Bul prokýrorǵa kedergiler endi ǵana qalyptasa bastaǵanda áreket etýge múmkindik beredi.
Buǵan deıin prokýrorlar «Aksa Energy Qyzylorda» JShS qolǵa alǵan ınvestjobanyń aldynda kezdesken máselege aralasty.