Qyzylorda oblysynda ınternet alaıaqtyqpen aınalysqan qylmystyq top qolǵa tústi

QYZYLORDA. KAZINFORM - Qyzylorda oblysynda ınternet alaıaqtyqpen aınalysqan qylmystyq top qolǵa tústi.

14-16 mamyr aralyǵynda oblys aýmaǵynda «Anti-fraud» jedel-profılaktıkalyq is-sharasy ótkizilýde. Atalǵan is-shara joǵary tehnologııalar salasyndaǵy qylmystardy ashý jáne olardyń aldyn alýǵa baǵyttalǵan.

«Jedel shara barysynda alaıaqtyqpen aınalysqan qylmystyq top qolǵa tústi. Eki azamat qalanyń 5 turǵynynyń senimine kirip, olardyń atynan nesıe rásimdegen. Turǵyndarǵa keltirilgen shyǵyn kólemi 5 mln teńgeden asady. Kúdiktiler qamaýǵa alyndy. Qazirgi tańda olardyń osy tektes basqa da qylmystarǵa qatystylyǵy tekserilýde», - dep málim etti Qyzylorda oblystyq Polıtsııa departamentinen.

Atalǵan is-sharanyń birinshi kúni 4 ınternet-alaıaqtyq qylmysy ashylyp, osy qylmystarǵa qatysy bar kúdiktiler ishki ister organdaryna jetkizildi.

Eske salsaq, budan buryn Qyzylordada eki jyldan beri halyqaralyq izdeýde júrgen kúdikti qolǵa tústi.