Qyzylordada ınklıýzıvti ınfraqurylym keńeıip keledi
QYZYLORDA. KAZINFORM — Múgedektigi bar adamdardyń zańdy quqyqtaryn qamtamasyz etý jáne olar úshin qoljetimdi ortany qalyptastyrý maqsatynda Qyzylorda oblysynda 1578 áleýmettik ınfraqurylym nysany tolyq beıim etip jabdyqtaldy. Bul týraly Eńbek jáne halyqty áleýmettik qorǵaý mınıstrligi málim etti.
Qazirgi ýaqytta Qazaqstan Respýblıkasynda 2025-2030 jyldarǵa arnalǵan ınklıýzıvti saıasat tujyrymdamasy, «Amanat» partııasynyń 2023-2027 jyldarǵa arnalǵan jol kartasy jáne Memleket basshysynyń tapsyrmasy boıynsha ázirlengen «Halyqpen birge» jobasy iske asyrylyp otyr.
«Amanat» partııasynyń jol kartasynda 2023-2027 jyldar aralyǵynda Interaktıvti qoljetimdilik kartasyna (budan ári — Karta) engizilgen 43 myńnan astam nysandy beıimdeý boıynsha jumys kózdelgen. Jyl saıyn osyndaı obektilerdiń 20%-y beıimdelýi tıis. Osylaısha, 2023 jyly — Kartadaǵy obektilerdiń 20%, 2024 jyly — 40%, 2025 jyly — 60%, 2026 jyly — 80%, 2027 jyly — 100%-y beıimdeledi. Qazirgi ýaqytta el boıynsha 24 216 nysan tolyqtaı beıimdelgen.
Búgingi tańda Qyzylorda oblysynda 1578 nysan beıimdeldi. 2027 jyldyń sońyna deıin 788 nysandy beıimdeý josparlanǵan.
Beıimdelgen nysandardyń jalpy sanynan múgedektigi bar adamdardyń barlyq sanattary úshin qoljetimdileri:
— densaýlyq saqtaý nysandary– 198;
— bilim berý nysandary — 339;
— mádenıet nysandary — 129;
— memlekettik jáne kvazımemlekettik uıymdar — 201;
— sport nysandary — 24;
— áleýmettik qorǵaý nysandary — 23;
— kólik ınfraqurylymy nysandary — 14;
— basqa da nysandar — 650.
— Eń bastysy — bizdiń únimizge qulaq asatyny. Biz kedergiler týraly Áleýmettik qorǵaý departamentine shaǵym túsirgen kezde, olar ony uzaqqa sozbaıdy. Tekseredi, sonyń nátıjesinde qajetti nysandarǵa qoljetimdiliktiń shynymen paıda bolǵanyn kórip júrmiz. Bul júıe jumys isteıdi, — dep óz pikirin bildirdi Almaty qalasynyń turǵyny, ekinshi toptaǵy múgedektigi bar Svetlana Ýteýlıeva.
Bıyl Halyqty Áleýmettik qorǵaý salasyndaǵy retteý jáne baqylaý komıtetiniń Qyzylorda oblysy boıynsha departamenti QR Áleýmettik kodeksiniń talaptarynyń oryndalýyn tekserý maqsatynda 129 tekseris júrgizdi. Onyń ishinde múgedektigi bar adamdardyń áleýmettik jáne kólik ınfraqurylymy nysandaryna qoljetimdiligin qamtamasyz etý máseleleri de qarastyryldy. Atap aıtqanda: profılaktıkalyq baqylaý aıasynda — 31, jospardan tys — 19, prokýratýra organdarynyń bastamasymen — 79 tekseris júrgizildi.
Tekserý nátıjesinde múgedektigi bar adamdardy áleýmettik qorǵaý jáne arnaıy áleýmettik qyzmetter kórsetý salasynda anyqtalǵan zańbuzýshylyqtardy joıý jóninde 37 nusqama berildi. Sondaı-aq jalpy somasy 4 mln 699,3 myń teńge bolatyn 37 ákimshilik aıyppul salyndy. Birlesken tekserýlerdiń qorytyndysy boıynsha prokýratýraǵa 79 qorytyndy usynyldy.
Obektilerdiń menshik ıelerine profılaktıkalyq baqylaý júrgizý kezinde zań buzýshylyqtar alǵash ret anyqtalǵan kezde ákimshilik jaýapkershilikke tartpaı, olardy joıý týraly nusqamalar ǵana engiziletinin atap ótý qajet. Nusqama belgilengen merzimde oryndalmaǵan jaǵdaıda ákimshilik aıyppul salynatyn bolady.