Qyzylordada tapshylyq bolmas úshin avtogaz talonmen satylýy múmkin

QYZYLORDA. KAZINFORM — Búgin túnde suıytylǵan gaz máselesine qatysty shuǵyl jıyn ótkizgen oblys ákiminiń birinshi orynbasary Danııar Janalınov quzyrly organdarǵa osyndaı mindet júktedi, dep habarlaıdy oblys ákiminiń baspasóz qyzmeti.

Oblys ákiminiń orynbasary óńirdegi barlyq operatordyń gaz qoryna monıtorıng júrgizip, qoldan tapshylyqty boldyrmaý úshin talon arqyly satý jáne baǵa saıasatyna zerdeleý júrgizýdi tapsyrdy.

— Zańnama talaptary buzylǵan jaǵdaıda naqty sharalar qabyldańyzdar. Polıtsııa departamenti, oblysqa bólingen gazdyń basqa óńirlerge tasymaldanýynyń aldyn alý úshin shekaralarǵa táýlik boıy kezekshilik ornatyp, baqylaýdy kúsheıtińizder. Óńirge bekitilgen suıytylǵan gaz basqa oblystarǵa ketpeýi tıis. Bir kúnniń ishinde halyqty gazben tolyq qamtý máselesin sheshýdi tapsyramyn, — dedi Danııar Janalınov.

Sonymen qatar gazdy kommertsııalyq nysandarǵa satpaı, birinshi kezekte halyqtyń suranysyn qamtamasyz etý mindeti júkteldi. 

Buǵan deıin Shymkent turǵyndary janarmaı quıý beketterindegi kezek pen suıytylǵan gaz  tapshylyǵyna shaǵymdandy.