Qyzylorda oblysynda gaz jarylysynan kúıik alǵan tórt jasóspirim úıge shyǵaryldy

QYZYLORDA. KAZINFORM — Qyzylorda oblysynda gaz jarylysynan zardap shekken tórt jasóspirim Almaty qalasynyń Balalar shuǵyl medıtsınalyq kómek ortalyǵynan úıine shyǵaryldy. Bul týraly QR Densaýlyq saqtaý mınıstrliginiń baspasóz qyzmeti málim etti.   

Zardap shekken balalar 28 shildede dene betiniń 85% jáne 89% qatty kúıiktermen shokqa qarsy qarqyndy terapııa bólimshesine jetkizildi. Dárigerler sonymen qatar toksemııa satysynda III dárejeli kúıik shogy men kúıik aýrýyn anyqtady, bul is júzinde ómirmen úılespeıdi. 

«Úsh apta boıy ortalyqtyń reanımatologtary balalardyń ómiri úshin kúresti, reanımatsııa jaǵdaıynda jaǵdaıdy turaqtandyrý úshin táýlik boıy qarqyndy shokqa qarsy terapııa júrgizildi, sodan keıin patsıentter beıindi kúıik bólimshesine aýystyryldy», — delingen habarlamada. 

Barlyq tórt patsıentke terini transplantattaý operatsııasy — aýtodermoplastıka qajet boldy.
Almatydaǵy BShMKO kombýstıologtary — Radja Jumadildaev pen Gúlsharat Júsipqalıeva kúrdeli operatsııalar serııasyn oryndady.

«Dárigerler patsıentterdiń ómiri úshin 83 kún boıy kúresti. Táýlik boıy úsh aıǵa jýyq meıirgerler naýqastyń tóseginen alys ketpedi jáne bul ómir úshin kúres jeńiske jetti», — dep habarlady Densaýlyq saqtaý mınıstrliginen.  

Almatynyń Balalar shuǵyl medıtsınalyq kómek ortalyǵynda bolǵan ýaqyttyń ishinde barlyq tórt patsıentke jeke medıtsınalyq post qamtamasyz etildi. 

Búgingi tańda emdelýde qalǵan eki patsıenttiń jaǵdaıy qanaǵattanarlyq dep baǵalanady, operatsııadan keıingi kezeń asqynýsyz ótti, transplantattaýlar tolyǵymen qabyldandy.

Keıinnen balalar turǵylyqty jeri boıynsha baqylanady, kútim jasaý jáne odan ári ońaltý boıynsha barlyq usynymdar beriledi.

Buǵan deıin habarlaǵandaı, Densaýlyq saqtaý mınıstrligi «Analar saýlyǵy» baǵdarlamasyn ázirledi.