Qyzylorda oblysynda esirtki qylmysy boıynsha 60 esepshot buǵattaldy

QYZYLORDA. KAZINFORM – Qyzylorda oblystyq polıtsııa departamenti 1-15 naýryz kúnderi aralyǵynda esirtkiniń zańsyz aınalymyna qarsy keshendi jumys atqardy.

Jedel profılaktıkalyq is-sharalar nátıjesinde 11 quqyqbuzýshylyq anyqtaldy. Onyń 3-eýi esirtki ótkizýge baılanysty bolsa, 8 derek teris qylyq retinde tirkeldi. Tártip saqshylary prokýrorlarmen birge esirtkini zańsyz jarnamalaý faktilerin anyqtaýǵa kúsh saldy.

– Qylmystyq ister aıasynda ekinshi deńgeıli bankterdegi 60 esepshot «Antıfrod» júıesi arqyly buǵattaldy. «Kıberqadaǵalaý» aqparattyq júıesi arqyly sıntetıkalyq esirtkini jarnamalaıtyn 40 saıt anyqtalyp, buǵattaldy. Nashaqorlyqtyń aldyn alý baǵytyndaǵy jumys úshin 2026 jylǵa jergilikti bıýdjetten 20 mln teńge bólindi. 50 is-shara uıymdastyrylyp, oǵan 1 800-den astam jasóspirim, ata-ana, pedagog tartyldy, – delingen habarlamada.

Buǵan deıin biz Petropavlda polıtseıler esirtki ótkizýmen aınalysty degen kúdikke ilingen 39 jastaǵy turǵyndy ustaǵanyn jazǵan edik.