Qyzylorda oblysynda elimizde alǵashqylar qatarynda «Jaıly mektep» ashyldy

  QYZYLORDA. KAZINFORM - Qyzylorda oblysynda ótken jyldan beri oblysta 1 myń 720 oryndyq 6 mektep el ıgiligine tabystalsa, 4 mektepke 1 myń 850 oryndyq qosymsha ǵımarat salyndy.

Bul týraly oblys ákimi Nurlybek Nálibaev Qyzylorda qalasynda ótken Ortalyq kommýnıkatsııalar qyzmetiniń kóshpeli brıfınginde aıtty

«Jańadan 3 mektep, 5 mektepke qosymsha qurylys salynyp, paıdalanýǵa berildi. «Jaıly mektep» ulttyq jobasy aıasynda elimizde alǵashqylardyń biri bolyp 900 oqýshyǵa arnalǵan bilim ordasy oblys ortalyǵyndaǵy jańa shaǵyn aýdanda oqýshylarǵa esigin ashty», - dedi N.Nálibaev.

«Bilim berý ınfraqurylymyn qoldaý» qory arqyly daryndy balalarǵa arnalǵan 400 oryndyq fızıka-matematıka mektep-ınternaty salynýda. Oǵan qosa bıyl «Qazgermunaı» kompanııasynyń demeýshiligimen Qyzylorda qalasynda 2,5 mlrd teńgege zamanaýı úlgidegi 350 oryndyq «Oqýshylar saraıy» paıdalanýǵa berildi. «Saýts Oıl» kompanııasynyń demeýshiligimen 4,8 mlrd. teńgege mýzykalyq kolledjdiń jańa ǵımaraty salynýda. Nysan 2025 jyly aıaqtalady.