Qyzylorda oblysynda elektr jabdyqtary tıelgen júk kóligi órtendi

QYZYLORDA. KAZINFORM - Qyzylorda oblysynda órtengen elektr jabdyqtary tıelgen júk kóligi tolyq sóndirildi. 

25 mamyrda Baıqońyr qalasy №8 órt sóndirý bóliminiń baılanys beketine Qazaly aýdanynyń Baıqoja aýylynyń tusynda «Samara-Shymkent» tas jolynyń boıynda fýra júk avtokóligi janýda degen habarlama kelip túsken. 

«Barlaý jumystaryn júrgizý barysynda «Volvo» júk avtokóligine tıelgen júktiń salmaǵy 9 tonna bolatyn elektr jabdyqtary (rozetka, vklıýchatel, perenoska) janǵany anyqtaldy. Órt tolyq sóndirildi. Oǵan №8 órt sóndirý bóliminen 1 tehnıkasymen 6 qyzmetker jumyldyryldy», - dep málim etti Qyzylorda oblystyq tótenshe jaǵdaılar departamentinen.

Eske salsaq, budan buryn Qyzylordada kafede bolǵan órtte qutqarýshylar 14 adamdy evakýatsııalady.