Qyzylorda oblysynda ekonomıkalyq qylmys azaıdy
QYZYLORDA. KAZINFORM — Qyzylorda oblysy boıynsha ekonomıkalyq tergep-tekserý departamenti jyl basynan bergi jumys nátıjesin jarııalady.
Osy kezge deıin departamenttiń óndirisinde 29 qylmystyq is bolǵan.
— Tirkelgen qylmystyq ister sany ótken jylmen salystyrǵanda azaıǵan. Al aıaqtalǵan 14 istiń 13-i sotqa joldanyp, memleket pen azamattarǵa keltirilgen zalaldyń basym bóligi óndirildi. Qylmystyq protsesterdi tsıfrlandyrý jumysy jalǵasyp jatyr. Osy oraıda jyl basynan beri isterdiń negizgi bóligi elektrondy formatta júrgizilgen, — dedi departament basshysynyń orynbasary Rýslan Satybaldıev.
Vedomstvo qyzmeti tek zań buzý derekterin anyqtaýmen shektelmeıdi. Sonymen qatar ekonomıkalyq jáne qarjylyq quqyqbuzýshylyqtardyń aldyn alý, azamattardyń qarjylyq saýattylyǵyn arttyrý jáne qoǵamda zań talaptaryn saqtaý mádenıetin qalyptastyrý baǵytynda jumys atqaryp keledi.
— Quqyqtyq saýattylyqty arttyrýǵa baǵyttalǵan 22 profılaktıkalyq is-shara ótkizdik. Oǵan 3 myńnan astam turǵyn tartyldy. Mektep oqýshylary men stýdentter dropperlik, qarjy pıramıdalary, lýdomanııa, kıberbýllıng, aqparattyq gıgıena jáne jasandy ıntellektini qaýipsiz paıdalaný týraly jan-jaqty aqparat aldy, — dedi Rýslan Satybaldıev.
Al ótken jyly departament óndirisinde 61 is boldy.
