Qyzylorda oblysynda Ekologııa departamenti ınvestordy zańsyz ákimshilik jaýapqa tartqan
QYZYLORDA. KAZINFORM – Qyzylorda oblysynyń tabıǵat qorǵaý prokýratýrasy QR Bıznes-protsesterdi Investorlardyń quqyqtaryn qorǵaý komıtetiniń úılestirýimen óńirlik Ekologııa departamentiniń qyzmetkerleri ınvestordy ákimshilik jaýapkershilikke zańsyz tartqany belgili boldy.
Bul zań buzýshylyq ınvestorlardyń quqyqtaryn qorǵaý salasyndaǵy zańnamanyń oryndalýyn tekserý barysynda anyqtaldy. Atap aıtqanda, Ekologııa departamentiniń laýazymdy tulǵalary prokýrordyń mindetti kelisiminsiz Ákimshilik quqyq buzýshylyq týraly kodekstiń 139-baby boıynsha ınvestordy ákimshilik jaýapkershilikke tartqan. Bul zań talaptarynyń buzylýy bolyp esepteledi.
«Prokýrorlyq súzgi» tetigine sáıkes, ınvestorlarǵa qatysty kez kelgen ákimshilik sharalar prokýratýra organdarymen mindetti túrde kelisýdi qajet etedi.
– Prokýratýranyń narazylyǵy negizinde zańsyz aıyppul salý týraly qaýly kúshin joıdy, ınvestordyń quqyqtary qalpyna keltirildi. Sonymen qatar Ekologııa departamentiniń bólim basshysyna kásipkerlik qyzmetke zańsyz aralasý faktisi boıynsha ákimshilik is qozǵaldy. Qazaqstan Respýblıkasynyń Ákimshilik quqyq buzýshylyq týraly kodeksiniń 173-baby boıynsha oǵan 100 aılyq eseptik kórsetkish mólsherinde aıyppul salyndy, - delingen habarlamada.
Prokýratýra ınvestorlarǵa qatysty zańsyz qysym kórsetý áreketterine qatań quqyqtyq baǵa beriletinin jáne bıznesti qorǵaý memlekettik baqylaýynyń mańyzdy baǵyttarynyń biri ekenin habarlady.
Aıta keteıik, buǵan deıin ShQO-da sheneýnikter ınvestorlarǵa qysym kórsetip, zańsyz aıyppul salǵanyn jazǵan edik.
