Qyzylorda oblysynda eki soǵys ardageriniń biri qaıtys boldy

QYZYLORDA. KAZINFORM — Qyzylorda oblysynda ekinshi dúnıejúzilik soǵys ardagerleriniń biri Tileýbergen Tobabergenuly qaıtys boldy. Bul týraly Qazaly aýdanynyń ákimdigi habarlady. 

Ol 1924 jyly Qazaly aýdanynyń Jambyl kolhozynda dúnıege kelgen. 1942 jyly Otan aldyndaǵy boryshyn óteýge shaqyrylyp, Tashkent qalasynda áskerı daıyndyqtan ótedi. Máskeý irgesindegi Smolensk qalasyna áskerı eshelonmen kelip, 150-zeńbirekti atqyshtar polki qatarynda maıdan dalasyndaǵy urystarǵa qatysqan. Bir jyldan keıin 291-atqyshtar polki quramyna jiberilip, Belorýssııa, Polsha, Chehoslovakııa, Kınıgsberg, Kalınıngrad qalalaryn jaýdan azat etýge atsalysty. Marshal G.Jýkov basshylyq etetin 158-gvardııalyq polktiń 28-avtomat rotasy sapynda bolyp, birneshe ret batyldyǵymen kózge túsken.

Qatardaǵy jaýynger 1945 jyldyń 9 mamyrynda Berlın qalasynda Jeńis kúnin qarsy alyp, soǵystan keıin nemis-fashıst basqynshylarynyń tutqynǵa alynǵan jaýyngerlerin kúzetýge qaldyrylady. Týǵan jerge 1947 jyly ǵana oralyp, zeınet jasyna deıin temirjol salasynda abyroıly eńbek etti.

Tileýbergen Tobabergenuly І dárejeli «Otan soǵysy» ordenimen, «Berlındi azat etkeni úshin», 1941-1945 jyldardaǵy «Uly Otan soǵysynda Germanııany jeńgeni úshin», «Jýkov» medalimen, «Belarýssııanyń nemis-fashıst basqynshylarynan azat etilgenine 60 jyl», «Uly Otan soǵysyndaǵy qajyrly eńbegi úshin», «SSSR Qarýly Kúshterine 70 jyl» jáne Uly Jeńistiń 20, 25, 30, 40, 50, 60, 65 jyldyǵy, «Eńbek ardageri», «Astanaǵa 10 jyl» medaldarymen marapattalǵan. «Qazaly aýdanynyń qurmetti azamaty».

Marqum Qyzylorda oblysy boıynsha ekinshi dúnıejúzilik soǵysqa qatysqan 2 ardagerdiń biri bolatyn.