Qyzylorda oblysynda eki aýdandaǵy ákim saılaýyna baılanysty barlyq ýchaske ashyldy

Qyzylorda oblysynda eki aýdanda ákim saılaýyna baılanysty 20 qazannan bastap barlyq ýchaske ashyldy. Olar  saılaýshylar tizimin jasaýǵa qatysty jumysyn bastady, dep habarlaıdy Kazinform. 

Syrdarııa jáne Shıeli aýdandarynda 5 qarasha kúni ákim saılaýy ótedi. Bul kúni Syrdarııada – 18, Shıelide 40 saılaý ýchaskesi qyzmet atqaryp, barlyǵy 388 komıssııa múshesi mańyzdy naýqandy ótkizýge atsalysady.

«Saılaý ótetin ýchaskelerdiń barlyǵy talapqa saı jabdyqtalǵan. Komıssııa músheleri saılaýshylardan daýys berý quqyǵyn beretin esepten shyǵarý kýáligine ótinishter qabyldaıdy. Saıası is-shara ótetin kúni daýys berýshi azamattarǵa qolaıly jaǵdaı jasalady. Al múgedektigi bar azamattar úshin arnaıy qoljetimdilik bolady. Búgingi kúni Shıeli aýdanynda – 560, Syrdarııada 299 daýys berýge quqyly múgedekti bar azamat tirkelgen. Barlyq saılaý úıi birinshi qabatta ornalasqan jáne aqparattyq portal inva.gov.kz-te qoljetimdilik kartasyna engizilgen. Múgedektigi bar azamattar úshin arnaıy kabınalar jasaqtalady. Estý, kórý qabileti tómen azamattarǵa qulaqqaptar men úlkeıtkish quraldar alynady. Bıýlletendi durys toltyrý joldary kórsetilgen arnaıy trafaretter, kórý qabileti tómen azamattar úshin aýdıo formattaǵy materıal da qoljetimdi bolady», - dep málim etti Qyzylorda oblystyq saılaý komıssııasynan.

Aıta ketsek, Syrdarııa aýdanynda 22 101, Shıeli aýdanynda 50 402 saılaýshy tirkelgen.