Qyzylorda oblysynda egistik alqaptaryna sý aıdaý úshin qutqarýshylar tartyldy
QYZYLORDA. KAZINFORM – Syrdarııa ózenindegi sý deńgeıiniń tómendeýi men topyraq ylǵaldylyǵynyń azaıýyna baılanysty aýyl sharýashylyǵy alqaptaryn sýmen qamtamasyz etý jumysy táýlik boıy jalǵasyp jatyr. Bul týraly Tótenshe jaǵdaılar mınıstrligi málimdedi.
Bıyl shilde aıynan bastap qutqarýshylar Qyzylorda oblysynyń Syrdarııa, Jalaǵash, Qazaly jáne Shıeli aýdandarynda shuǵyl is-sharalarǵa tartyldy.
– Jumys júrgiziletin aımaqqa elimizdiń barlyq óńirinen kúsh-quraldar jiberildi. Barlyǵy 77 qyzmetker, 26 tehnıka, 25 jyljymaly sorǵy stantsııasy tartylǵan. Bul egistik alqaptaryna sý jetkizý máselesin tıimdi sheshýge múmkindik beredi, -delingen habarlamada.
Osy kúnge deıin egistikterdi sýarý úshin 14 595 017 tekshe metr sý aıdaldy.
Al Aral-Syrdarııa basseındik ınspektsııasynyń mamandary buǵan deıin Syrdarııa ózeninen sýdy zańsyz alyp kelgen 9 tirkelmegen sorǵy qondyrǵysyn anyqtady.