Qyzylorda oblysynda búırek aýystyrý otasy jasaldy

Qyzylorda oblystyq kópbeıindi aýrýhanada búırek aýystyrý otasy jasaldy. Ony A. Syzǵanov atyndaǵy Ulttyq ǵylymı hırýrgııa ortalyǵy basqarma tóraǵasy, medıtsına ǵylymdarynyń doktory, professor Bolatbek Baımahanovtyń basshylyǵymen qyzylordalyq dárigerler sátti atqaryp shyqty, dep habarlaıdy Kazinform.

Sońǵy úsh jyldan beri jasandy búırek apparatyna táýeldi bolyp kelgen 25 jastaǵy naýqastyń endi burynǵydaı tolyqqandy ómirge oralýyna jol ashyldy. Dıalız ortalyǵyna táýeldi bolýdan qutyldy. Sátti ota naýqasty ýaqyt pen tamaqtanýǵa baılanysty shekteýlerden bosatty. Naýqasqa 36 jastaǵy týysqan aǵasy donor bolýǵa kelisimin bergen. 

«Elimizde 2011 jyldan beri búırek jáne baýyr transplatatsııasy keń aýqymda júrgizilip keledi. Búginge deıin 1 000-ǵa tarta ota jasaldy. Onyń 700-i búırekke qatysty bolsa, qalǵanyn baýyr transplantatsııasy quraıdy. Bul – óte kúrdeli is, oǵan árbir dáriger úlken jaýapkershilikpen qaraıdy. Tájirıbesi joǵary bolýy eskeriledi. Biz oblystyq kópbeıindi aýrýhana dárigerleriniń usynysyn qabyl aldyq. Aýrýhana oǵan qajetti medıtsınalyq qural-jabdyqtarmen qamtamasyz etilgen. Ota tórt saǵattan astam ýaqytqa sozyldy. Jalpy, bul óte jiti nazarda bolady. Barlyǵy aldyn-ala zertteledi», - deıdi Bolatbek Baımahanov.

Em alýshy oblystyq densaýlyq saqtaý basqarmasy janyndaǵy retsıpıent pen donor arasyndaǵy genetıkalyq baılanysty rastaıtyn etıkalyq komıssııadan ótken. Komıssııa quramyna zańgerler men quqyq qorǵaý organdarynyń ókilderi kirdi. 

Aıta keteıik, qazirgi ýaqytta Qyzylorda oblysynda 85 transplantatsııalanǵan naýqas bar.