Qyzylorda oblysynda brakonerlerden 2,3 mln teńge aıyppul óndirildi

QYZYLORDA. KAZINFORM — Qyzylorda oblysynda jalpy kólemi 9,8 mln gektar 41 ańshylyq alqaby bar. Onyń 27-si tabıǵat paıdalanýshylarǵa bekitilip berilgen, 14-i rezervte tur.

Oblystyq tabıǵı resýrstar jáne tabıǵat paıdalanýdy retteý basqarmasy habarlaǵandaı, Syr óńirin sútqorektilerdiń 40-tan astam, qustardyń 300 túri mekendeıdi. Onyń 30 shaqtysy Qazaqstannyń Qyzyl kitabyna engen.

Ekologııa jáne tabıǵı resýrstar mınıstrligi 2025 jyl men 2026 jyldyń 15 aqpany aralyǵynda Qyzylorda oblysyna 109 128 janýarlar dúnıesi obektisin alyp qoıý lımıtin bekitti. Onyń ishinde qaban, túlki, qoıan, borsyq, qaz, úırek, qasqaldaq, qyrǵaýyl sııaqty ań-qustar bar. 

— Brakonerlikpen kúres sharalary basty nazarda. Orman jáne janýarlar dúnıesin qorǵaý jónindegi mekemeler, oblystyq janýar dúnıesin memlekettik qorǵaý jónindegi mamandandyrylǵan mekeme 300-den astam reıdtik is-shara uıymdastyrdy. Reıd nátıjesinde 162, onyń ishinde janýarlar dúnıesin paıdalaný jáne ań aýlaý qaǵıdalaryn buzýdyń 29 deregin anyqtady. Balyq aýlaý, balyq resýrstary men basqa da sý janýarlaryn qorǵaý qaǵıdalaryn buzý boıynsha 99 quqyqbuzýshylyq tirkeldi. Zań talabyn buzǵandardan 2,3 mln teńge aıyppul tolyǵymen óndirildi, — delingen basqarmanyń málimetinde.

Al ótken jyly Atyraý oblysynda balyq aýlaý erejelerin buzýǵa qatysty 2200-den astam zańbuzýshylyq tirkelgenin jazdyq.