Qyzylorda oblysynda bir aılyq sábı TJM tikushaǵymen aýrýhanaǵa shuǵyl jetkizildi
ASTANA. KAZINFORM — Qyzylorda oblysynyń Tóretam kentinen bir aılyq sábı shuǵyl túrde Qyzylorda qalasyna evakýatsııalandy, dep habarlaıdy Tótenshe jaǵdaılar mınıstrligi.
Shuǵyl medıtsınalyq kómek kórsetý úshin kezekti sanıtarlyq reısti TJM «Qazavıaqutqarý» avıakompanııasynyń tikushaq ekıpajy oryndady.
«Áýe kemesiniń bortynda ekıpajben birge balany ertip júrgen medıtsına qyzmetkerleri boldy. Ushqyshtardyń kásibıligi men medıtsınalyq brıgadanyń úılesimdi jumysynyń arqasynda ushý sátti ótti. Bala medıtsınalyq mekemege jetkizildi jáne mamandardyń baqylaýyna berildi», delingen TJM baspasóz qyzmetiniń aqparatynda.
Sondaı-aq osy kúni Aqmola oblysynda da «Qazavıaqutqarý» tikushaǵynyń ekıpajy Kókshetaý – Stepnogorsk – Kókshetaý baǵyty boıynsha sanıtarlyq reısti oryndap, birinshi dárejeli aýyz qýysy shyryshty qabyǵynyń hımııalyq kúıigi dıagnozy qoıylǵan tórt jasar sábıdi shuǵyl túrde oblys ortalyǵyna jetkizdi.
TJM-niń habarlaýynsha, kishkentaı naýqasqa mamandandyrylǵan medıtsınalyq kómek qajet bolǵan. Ushqyshtar men medıtsınalyq brıgadanyń úılesimdi jumysynyń arqasynda bala emdeý mekemesine jedel jetkizilipti.
«Ushýdy áýe kemesiniń komandıri Beıbit Smaǵulov jáne ekinshi ushqysh Shyńǵys Málikrııanov basqarǵan ekıpaj oryndady. Qazavıaqutqarý tikushaqtary sanıtarlyq avıatsııanyń mindetterin oryndaýǵa árdaıym daıyn jáne eldiń eń qıyn qıyrynda da ómirdi saqtap qalyp jatyr», delingen TJM habarlamasynda.
Eske sala ketsek, ótken aptada TJM sanavıatsııasy balany anasymen birge shuǵyl túrde Atyraý qalasyndaǵy aýrýhanaǵa jetkizdi.