Qyzylorda oblysynda bıylǵy alǵashqy ákim saılaýy ótti

QYZYLORDA. KAZINFORM – Qyzylorda oblysynda bıyldyqqa birinshi ret keshe, 8 aqpan kúni Syrdarııa aýdanynyń Tereńózek kentinde ákim saılandy. Bul týraly oblystyq saılaý komıssııasynan habarlady.

Saılaýshylar tizimine 7376 azamat engizilgen. Sonyń 4743-i nemese 64,30 paıyzy bıýlleten aldy. Onyń ishinde esepten shyǵarý kýálikterin tańdaǵan eshkim bolǵan joq. Daýys berý úı-jaıynan tys jerde 37 adam daýys berdi. 66 bıýlleten jaramsyz dep tanyldy. Laýazymdy qyzmetke 3 kandıdat talasty.

- Daýys berý nátıjesinde kandıdat Ǵalymjan Akbarov úshin 1395 daýys, Nurjan Bısembaev úshin 2932 daýys, Erejep Esenkeldi úshin 306 daýys jáne «Barlyǵyna qarsy» belgisimen 44 daýys berildi. Qorytyndysynda «AMANAT» partııasy usynǵan Nurjan Bısembaev Tereńózek kentiniń ákimi bolyp saılandy, - delingen habarlamada.

Ol 1976 jyly týǵan. Buǵan deıin Syrdarııa aýdandyq qurylys, sáýlet jáne qala qurylysy bólimin basqarǵan.

Eske salaıyq, bıyl Qyzylorda oblysynda 29 kent jáne aýyldyq okrýg ákimi saılanady.